Dýrast að eyða helgi í Reykjavík af öllum höfuðborgum Evrópu

Reykjavík er dýrasta ferðamannaborg Evrópu samkvæmt árlegri verðkönnun bresku póstþjónustunnar. Samkvæmt úttektinni kostar helgi í höfuðborginni um 463 pund eða rétt tæpar 72 þúsund krónur.

Breska póstþjónustan tekur á hverju ári saman kostnaðinn við að eyða einni helgi í tilteknum borgum í Evrópu. Reiknaðir eru saman nokkrir þættir sem endurspegla verðið á húsnæði, samgöngum og fæði ásamt aðgangi í helstu söfn.

Ódýrasta borgin þetta árið er höfuðborg Litháens, Vilníus, en borgaryfirvöld hafa lagt mikið upp úr því að fá til sín ferðamenn. Fóru þau nýverið í kynningaherferð fyrir borgina sem vakti athygli, en þar er borgin markaðssett sem G-blettur Evrópu. „Enginn veit hvar hún er, en þegar þú finnur hana er hún frábær,“ segir slagorð kynningarherferðarinnar.

Helgarfríið kostar mismikið í Evrópu

Fimm dýrustu borgirnar:

1. Reykjavík - 71.936 kr.

2. Amsterdam - 69.087 kr.

3. Ósló - 69.058 kr.

4. Helsinki - 68.412 kr.

5. Kaupmannahöfn - 63.951 kr.

Fimm ódýrustu borgirnar:

1. Vilnius - 22.913 kr.

2. Belgrad - 23.569 kr.

3. Varsjá 24.934 kr.

4. Istanbúl 25.942 kr.

5. Búkarest - 26.084 kr.