Hvassviðri og ofankoma

Gular viðvaranir eru í gildi fyrir Breiðafjörð, Vestfirði, Norðurland vestra og Miðhálendið og munu þær vara fram á kvöld. Varað er við hvassviðri og éljagangi, með vindhviðum allt að 40 m/s, og þannig geti myndast varhugaverðar akstursaðstæður á þessum svæðum.

Það sé því útlit fyrir suðvestan storm í dag, jafnvel rok um tíma norðvestantil á landinu. Einnig eru horfur á að úrkoma færi sig yfir í snjókomu eða él með kólnandi veðri og lélegu skyggni á köflum. Veðurfræðingur hjá Veðurstofunni segir að það verði þó úrkomulítið austanlands, eins og svo oft í þessari vindátt, og hiti verði þar vel fyrir ofan frostmark fram á kvöld.

Það er áfram suðvestanátt með éljagangi í kortunum á morgun. Einnig er von á stærri úrkomubökkum með samfelldri snjókomu. „Vindstyrkur verður víða strekkingur, en gæti orðið allhvasst í verstu éljahryðjunum og eru mestar líkur á því með suður- og vesturströndinni. Áfram verður lítil eða engin úrkoma á Austurlandi. Víða má búast við vægu frosti á morgun,“ segir veðurfræðingurinn.

Það sé hins vegar útlit fyrir hægara veður á föstudag og laugardag, en væntanlega muni herða á frosti.

Veðurhorfur á landinu næstu daga

Á föstudag:

Vestlæg átt 3-10 m/s, en 10-15 A-lands. Víða él, en þurrt SA-til. Frost 0 til 5 stig. Hægari norðanátt um kvöldið og herðir á frosti. 

Á laugardag:

Hæg breytileg átt og víða léttskýjað framan af degi, kalt í veðri. Gengur í suðvestan 8-13 seinnipartinn með snjókomu eða slyddu S- og V-lands um kvöldið. Hiti um og undir frostmarki. 

Á sunnudag:

Suðvestan 8-15 m/s og slydda eða snjókoma, en rigning við ströndina. Þurrt um landið NA-vert. Hiti 0 til 4 stig. 

Á mánudag:

Gengur í norðanátt með ofankomu á norðurhelmingi landsins, en rofar til syðra. Kólnandi veður. 

Á þriðjudag:

Útlit fyrir að dragi úr norðanáttinni, stytti upp og áfram kalt í veðri.