Má búast við miklum leysingum og á­lagi á frá­rennslis­kerfi

Það má búast við miklum leysingum um allt land í dag þar sem farið er að bæta í vind og hlýna að því er fram kemur í hugleiðingum veðurfræðings á vef Veðurstofu Íslands.

Þar segir að það reyni mikið á frárennsliskerfi í þéttbýli og því sé góð leið til að fyrirbyggja vatnstjón að greiða leið vatns í niðurföll.

Það mun bæta talsvert í rigningu með morgninum sunnan- og vestan til og er því spáð að hitinn fari víða í 5 til 8 stig.

Á Norðurlandi sem og sums staðar á Vestfjörðum og Austfjörðum er meiri snjór en syðra og þar geta myndast aðstæður sem leiða til aukinnar hættu á snjóflóðum.

Eins munu ár og lækir ryðja sig víðast hvar og þá geta myndast klakastíflur. Það getur því borgað sig að sýna árvekni ef maður er á ferðinni í dag.

Veðurhorfur á landinu:

Vaxandi suðaustanátt og snjókoma eða slydda í fyrstu á S- og V-landi, en síðar rigning. Víða suðaustan 10-18 í dag og 13-20 NV-lands um kvöldið. Talsverð rigning, en úrkomulítið norðaustantil á landinu. Hlýnandi, hiti 4 til 8 stig síðdegis.

Suðvestan 8-15 á morgun en 13-20 N- og NV-lands. Skúrir framan af degi en síðan dálítil él. Bjartviðri á austanverðu landinu. Kólnar smám saman, hiti um og rétt fyrir frostmarki um kvöldið.

Á þriðjudag:

Suðvestan 10-18 og dálítil él, en léttir til A-lands. Hiti 1 til 8 stig, hlýjast austast, en í kringum frostmark um kvöldið.

Á miðvikudag:

Allhvöss sunnanátt og rigning eða slydda, en úrkomulítið NA-til á landinu. Hiti 1 til 6 stig. Vestlægari með éljum og kólnar seinnipartinn, fyrst V-lands.

Á fimmtudag:

Suðvestanátt. Víða snjókoma eða slydda, þurrt N-lands framan af degi en él um landið V-vert. Hiti um eða undir frostmarki.