Hafa náð sambandi við göngumanninn

Björgunarsveitir í Eyjafirði eru komnar í símasamband við göngumann sem leitað hefur verið að á hálendinu síðan í morgun. Þá er búið að staðsetja manninn og eru nokkrir björgunarmenn á leið til hans.

Samkvæmt upplýsingum frá Landsbjörg sagðist maðurinn ekki þurfa á aðstoð að halda. Þegar náðist samband við hann var flestum björgunarsveitarmönnum snúið við en nokkrir úr leitarhópnum hafa þó verið sendir til móts við manninn til að kanna líðan hans.

Aðstandandi mannsins hafði samband við viðbragðsaðila í nótt og sagði manninn í vandræðum. Þá kom síðar fram í tilkynningu frá Landsbjörg að maðurinn hefði verið búinn að missa frá sér sleðann með farangri sínum. Sagði hann þá aðstandendum sínum að hann væri kaldur, uppgefinn og hræddur.