Ástin á götunni: Best ef konan færi á skeljarnar

Á sumrin þegar grasið verður grænna og himininn blárri er ekki laust við að loftið lykti af rómantík og þrá. Við verðum rjóðari í kinnum, kaupum ís, klæðumst bjartari litum og lendum jafnvel í spennandi ævintýrum. 

Þetta er einnig tími breytinga og eru stór kaflaskil í lífi fólks tíðari. Á vorin er tíðni sambandsslita aldrei eins há meðan sumrin eru tími nýrra ástarævintýra og sambanda.

Makamál kíktu eitt sólríkt hádegi í maí í miðbæ Reykjavíkur og spurði fólk um sambönd, rómantík og ástina. Þegar kom að því hvor makinn eigi að biðja um hönd hins voru ekki allir á sama máli.