Allt að 25 stig í dag og „fínasta veður“ um verslunar­manna­helgina

Búast má við áframhaldandi hlýindum í dag en veður fer síðan smám saman kólnandi, að því er fram kemur í hugleiðingum veðurfræðings á vef Veðurstofu Íslands. Þá lítur út fyrir að veðrið um næstu helgi, verslunarmannahelgina, verði gott víðast hvar á landinu.

Í dag verður austlæg átt, skýjað með köflum eða bjartviðri þegar líður daginn og hiti 18 til 25 stig. „Ekki njóta þó öll landsvæði veðurblíðunnar því búast má við þrálátu þokulofti við Húnaflóa og austantil á landinu með mun svalara veðri,“ segir í hugleiðingum veðurfræðings.

Þá verða stöku skúradembur suðvestantil á landinu síðdegis í dag og á öllu sunnanverðu landinu í nótt. Heldur hvassari vindur á morgun og víða skúrir, síst þó norðan- og norðvestanlands.

Í hæðarsvæði um verslunarmannahelgi

Nú styttist jafnframt óðum í verslunarmannahelgina sem ber upp um næstu helgi.

„Ekki er annað að sjá en að boðið verði upp á fínasta veður um allt land,“ segir í hugleiðingum veðurfræðings um verslunarmannahelgarveðrið. Er vísað til þess að „ágætur stöðugleiki“ hafi verið í spám undanfarna daga en um verslunarmannahelgina verði landið inni í hæðarsvæði.

Því verði hægur vindur og víða þurrt og bjart á föstudag og laugardag og hiti að 20 stigum. Þó verður heldur skýjaðra og dálitlar skúrir á sunnudag og mánudag.

 

Veðurhorfur á landinu næstu daga

Á þriðjudag:

Austlæg átt 5-13 m/s og skúrir, en úrkomulítið norðantil. Hiti 10 til 22 stig að deginum, hlýjast í innsveitum vestanlands, en svalast við A-ströndina. 

Á miðvikudag:

Austlæg átt 5-10 m/s, en hvassara við suður- og norðurströndina. Skúrir sunnantil á landinu, en annars bjartviðri. Hiti breytist lítið. 

Á fimmtudag, föstudag og laugardag:

Austlæg eða breytileg átt, skýjað með köflum eða bjartviðri og yfirleitt þurrt, en þokubakkar við norður- og austurströndina. Hiti 12 til 20 stig. 

Á sunnudag:

Austlæg átt, skýjað með köflum og stöku skúrir. Kólnar lítið eitt.