Vegur yfir Dynjandisheiði fimm árum á eftir Dýrafjarðargöngum

Dýrafjarðargöng verða fyrstu fimm rekstrarárin án tengingar við heilsársveg um Dynjandisheiði, miðað við drög að samgönguáætlun, en samkvæmt henni hefst uppbygging nýs vegar yfir heiðina vart fyrr en eftir tvö ár. Þetta kom fram í fréttum Stöðvar 2. 

Nú þegar styttist í opnun Dýrafjarðarganga, sem áætluð er eftir tæpt ár, verður sú spurning áleitnari: Hvað með framhaldið?

Frá Dýrafjarðargöngum liggur nefnilega einn lengsti samfelldi ómalbikaði kaflinn sem eftir er á aðalþjóðvegakerfi landsins, alls sjötíu kílómetrar frá Mjólkárvirkjun til Flókalundar og svo af heiðinni til Bíldudals.

Dýrafjarðargöngum hefur verið lýst sem dýrasta botnlanga landsins meðan ekki kemur vegur yfir Dynjandisheiði. Sveitarstjórnarmenn segja tómt mál að tala um samstarf og sameiningu innan Vestfjarða meðan ekki er hægt að komast akandi á milli. 

„Ísfirðingar geta ekki mætt á bæjarstjórnarfundi hér í Vesturbyggð og Tálknafirði ef ekki kemur almennilegur vegur. Það er ekki nóg fyrir þá að mæta hingað bara á sumrin. Þeir verða að geta komist líka hingað á bæjarstjórnarfundi á veturna,“ segir Bryndís Sigurðardóttir, sveitarstjóri á Tálknafirði. 

Það gætu verið sex ár í að Dynjandisheiðin klárist, miðað við nýjustu áætlun.

 

„Án ábyrgðar þá getum við kannski sagt það að það er svona innan tveggja ára sem þetta verk ætti að vera komið í gang,“ svarar Guðmundur Björgvinsson, yfirverkstjóri Vegagerðarinnar á Ísafirði, spurður um endurbyggingu vegarins um Dynjandisheiði, miðað við nýjustu upplýsingar um samgönguáætlun. 

„Ef þetta er fullfjármagnað og gengur vel þá eru menn að búast við að þetta sé verkefni sem taki að minnsta kosti þrjú ár til viðbótar. Þannig að þá, - nú er að detta 2020 á næsta ári, - eigum við ekki að segja það að við skulum hittast haustið 2025 og vonast til að þá verði farið á sjá í endann á þessu,“ segir yfirverkstjórinn.

En fleira hangir á spýtunni, draumurinn um Vestfjarðahringinn, hringveg tvö, sem ferðaþjónustan á Vestfjörðum er byrjuð að undirbúa. 

„Vestfjord Circle held ég að það verði látið heita, sem verður svona ferðamannaaðdráttarafl fyrir okkur, og á að vera jafngildi hins hringvegarins,“ segir sveitarstjóri Tálknafjarðar. 

Hér má sjá frétt Stöðvar 2: