Byltingarkenndur bíll frá Mercedes-Benz

Mercedes-Benz AVTR hefur verið kynntur til leiks, um er að ræða byltingakenndan hugmyndabíl frá þýska lúxusbílaframleiðandanum. Nafnið stendur fyrir Advanced Vehicle Transformation. Bíllinn lýsir framtíðarsýn Mercedes-Benz varðandi hönnun, aksturseiginleika og tækni.

Mercedes-Benz AVTR er undir áhrifum frá Avatar kvikmyndinni sem sló í gegn fyrir nokkrum árum. Bíllinn er samstarfsverkefni Mercedes-Benz og afþreyingarfyrirtækisins Pandora sem er skýrt í höfuðið á samnefndri plánetu í myndinni Avatar.

Mercedes-Benz AVTR notar byltingarkenndar rafhlöður sem eru lífrænar og lausar við málma. Rafhlöðurnar eru því endurvinnanlegar. Sætin í bílnum eru framleidd úr vegan Dinamica leðri. Í innanrými bílsins er viður sem nefnist Karuun og gefur hann innanrými bílsins náttúrulegt og hlýlegt yfirbragð.

Myndband um bílinn.

Bíllinn á að sýna nýja nálgun á milli fólks, véla og náttúru. Bíllinn er mjög framúrstefnulegur og hátæknivæddur. Í stað venjulegs stýris er margnota stjórntæki fyrir miðju rýmisins frammí sem gerir fólki og vélum möguleika á að tengjast. Hægt er að kveikja á innanrýminu í bókstaflegri merkingu með því að setja höndina á stjórntækið og bíllinn þekkir þá ökumanninn með hjartslætti og andardrætti hans.

Ökumaður stjórnar akstrinum með stjórntækinu og farþegi frammí getur einnig stjórnað fjölmörgu með stjórntækinu m.a. 3D rauntíma grafík sem getur skannað heim Avatar frá mismundandi sjónarhornum. Þetta háþróaða stjórntæki getur búið til sjónræna tengingu á milli farþega inn í bílnum og þess sem er í gangi fyrir utan hann.