Næstum því sextán mánuðir síðan Keflvíkingar unnu KR-inga síðast

KR-ingar hafa tapað fleiri leikjum undanfarin tímabil en í tímabilunum á undan en hafa getað treyst á það að vinna leiki sína við Keflvíkinga. Liðin mætast í DHL-höllinni í kvöld og verður leikurinn í beinni útsendingu á Stöð 2 Sport.

Keflvíkingar mæta í DHL-höllina í kvöld sex stigum og fjórum sætum ofar en Íslandsmeistarar KR í töflunni og með það markmið að enda tæplega sextán mánaða bið.

Keflavík vann síðast sigur á KR í karlakörfunni þegar liðin mættust í deildarkeppninni fyrir 483 dögum eða 12. október 2018.

Keflavík vann þá sex stiga sigur, 85-79, þar sem núverandi KR-ingur, Michael Craion var KR-liðinu mjög erfiður með 27 stig, 6 stoðsendingar, 5 fráköst og 4 stolna bolta.

Maður leiksins var þó líklega bakvörðurinn Reggie Dupree sem skoraði 12 af 19 stigum sínum á síðustu fjórum mínútum leiksins á meðan Keflavíkurliðið breytti stöðunni úr 69-77 fyrir KR í 83-77 fyrir Keflavík með 14-0 spretti.  Reggie hitti úr 4 af 5 þriggja stiga skotum sínum í leiknum þar af setti hann niður þrjá þrista í lok leiksins.

KR og Keflavík mættust fimm sinnum á árinu 2019 og KR-ingar unnu alla leikina þar á meðal alla þrjá leikina í átta liða úrslitum úrslitakeppninni.

KR-liðið vann líka fyrri leik liðanna í vetur en KR vann þá með minnsta mun í Keflavík, 67-66. Brynjar Þór Björnsson skoraði sigurkörfuna en KR-liðið skoraði fjögur síðustu stig leiksins.

KR hefur unnið 11 af 14 leikjum liðanna á Íslandsmótinu undanfarin fjögur tímabil þar af 6 af 7 leikjum liðanna í úrslitakeppninni og 5 af 6 leikjum liðanna í DHL-höllinni.

Stöð 2 Sport verður eins og áður á föstudagskvöldum með mikla körfuboltaveislu. Fyrst verður sýndur leikur Vals og Stjörnunnar klukkan 18.30, útsending frá leik KR og Keflavík kemur strax i kjölfarið og eftir leikinn í Vesturbænum verður síðan Domino´s Körfuboltakvöld í beinni frá Suðurlandsbrautinni.

- Síðustu fjórtán leikir KR og Keflavíkur á Íslandsmóti karla í körfubolta -

15. nóvember 2019: KR vann 1 stigs sigur í Blue-höllinni (67-66)

28. mars 2019: KR vann 21 stigs sigur í Blue-höllinni (85-64, úrslitakeppni)

25. mars 2019: KR vann 9 stiga sigur í DHL-höllinni (86-77, úrslitakeppni)

22. mars 2019: KR vann 1 stigs sigur í Blue-höllinni (77-76, úrslitakeppni)

11. janúar 2019: KR vann 4 stiga sigur í DHL-höllinni (80-76)

12. október 2018: Keflavík vann 6 stiga sigur í Blue-höllinni (85-79)

16. febrúar 2018: Keflavík vann 7 stiga sigur í DHL-höllinni (72-65)

19. nóvember 2017: KR vann 17 stiga sigur í Blue-höllinni (102-85)

11. apríl 2017: KR vann 2 stiga sigur í Blue-höllinni (86-84, úrslitakeppni)

7. apríl 2017: KR vann 3 stiga sigur í DHL-höllinni (91-88, úrslitakeppni)

3. apríl 2017: Keflavík vann 7 stiga sigur í Blue-höllinni (81-74, úrslitakeppni)

30. mars 2017: KR vann 19 stiga sigur í DHL-höllinni (90-71, úrslitakeppni)

2. mars 2017: KR vann 2 stiga sigur í DHL-höllinni (82-80)

2. desember 2016: KR vann 26 stiga sigur í Blue-höllinni (106-80)

Samtals í þessum fjórtán síðustu leikjum liðanna

11 KR sigrar (79%)

3 Keflavíkur sigrar (21%)

6 leikir sem unnust með 4 stigum eða minna (43%)

9 leikir sem unnust með 7 stigum eða minna (64%)