Håland heldur áfram að skora

Erling Braut Håland skoraði enn einn ganginn þegar Borussia Dortmund lagði Werder Bremen að velli, 0-2, í þýsku úrvalsdeildinni í dag.

Þetta var tólfta mark norska framherjans í átta leikjum fyrir Dortmund.

Franski miðvörðurinn Dan-Axel Zagadou kom Dortmund yfir á 52. mínútu eftir sendingu Jadons Sancho. Enski landsliðsmaðurinn hefur nú lagt upp 17 mörk í þýsku deildinni í vetur.

Á 66. mínútu skoraði Håland annað mark Dortmund með föstu hægri fótar skoti eftir sendingu frá Achraf Hakimi.

Dortmund er í 2. sæti deildarinnar með 45 stig, fjórum stigum á eftir toppliði Bayern München.

Borussia Mönchengladbach fór illa að ráði sínu gegn Hoffenheim. Matthias Ginter kom Gladbach yfir á 11. mínútu en Lucas Ribeiro jafnaði fyrir Hoffenheim í uppbótartíma. Lokatölur 1-1. Gladbach er í 4. sæti deildarinnar með 43 stig.

Köln rúllaði yfir Herthu Berlin í höfuðborginni, 0-5, og Düsseldorf vann gríðarlega mikilvægan sigur á Freiburg, 0-2.

Úrslit dagsins:

Werder Bremen 0-2 Dortmund

Mönchengladbach 1-1 Hoffenheim

Hertha Berlin 0-5 Köln

Freiburg 0-2 Düsseldorf