Grænn múr rís yfir þvera Afríku

Rúmlega 1800 milljarðar íslenskra króna söfnuðust í vikunni til stuðnings verkefni sem kennt er við grænan múr og teygir anga sína þvert yfir Afríku. Múrinn er stórverkefni undir forystu íbúa Afríku, framlag þeirra í baráttunni við loftslagsbreytingar, uppflosnun fólks, þurrka og átök. Verkefnið felst í því að gróðursetja tré og skapa ræktunarland þvert yfir Sahel svæðið.

Græni múrinn (The Great Green Wall) er alþjóðlegur vettvangur aðgerða í baráttunni gegn loftslagsbreytingum. Markmiðið er að „hraða umskiptum í heiminum yfir í réttlátara hagkerfi þar sem loftslagsbreytingar og náttúran eru í öndvegi,” eins og segir í frétt frá Upplýsingaskrifstofu Sameinuðu þjóðanna (UNRIC).

Á leiðtogafundi – One Planet Summit – sem haldinn var í vikubyrjun að frumkvæði frönsku stjórnarinnar í samvinnu við Sameinuðu þjóðirnar og Alþjóðabankann var samþykkt áætlun um að hraða fjármögnun og bæta samhæfingu verkefnisins. Staðfest framlög námu 14 milljörðum dala eða um 1800 milljörðum íslenskra króna.

Fyrsti fundurinn var haldinn í árslok 2017, tveimur árum eftir að Parísarsamningurinn var gerður. Fundirnir eru tækifæri fyrir pólitíska leiðtoga, einkageirann, sjóði, almannasamtök og almenning til að koma saman og skilgreina verkefni og finna fjármagn til baráttu í þágu loftslagsins, fjölbreytni lífríkisins og hafsins. Fundurinn á mánudag var fjórði fundurinn og þema hans var „Sameinumst í þágu náttúrunnar.“

„Frá því verkefninu var hleypt af stokkunum árið 2007 hefur múrinn teygt anga sína yfir allt Sahel svæðið frá Senegal í vestri til Djibouti í austri. Hann nær til ellefu ríkja og er grundvallaratriði í því að ná heimsmarkmiðunum um sjálfbæra þróun fyrir 2030,“ segir í frétt UNRIC.

„Endurreisn eftir heimsfaraldurinn er okkar tækifæri til að breyta stefnu,“ sagði António Guterres aðalframkvæmdastjóri Sameinuðu þjóðanna í ávarpi til fundarins. „Með slungnum áætlunum og réttum fjárfestingum getum við fetað braut sem tryggir heilbrigði allra, endurlífgun hagkerfa og aukið þanþol. Nýsköpun í orkugeiranum og samgöngum getur rutt brautina fyrir sjálfbærri endurreisn og félagslegum og efnahagslegum umskiptum. Lausnir sem sóttar eru til náttúrunnar, eins og græni múrinn mikli, lofa góðu.“