Smyglaði hárgreiðslumanni upp á hótel fyrir Miss World

Linda segir frá sínum uppáhalds förðunar- og snyrtivörum ásamt því að ræða um það sem hún gerir fyrir sína húð í þættinum Snyrtiborðið með HI beauty.

„Partur af rútínunni minni er að ég drekk mikið vatn. Ég drekk tvo eða tvo og hálfan líter á dag og byrja alla daga á að drekka tvö stór vatnsglös.“

Þáttinn í heild sinni má heyra í spilaranum hér fyrir neðan.

Húðin lykilatriði

Linda fer einnig í saunu og kalda sturtu á morgnana og segist nota það sem ákveðið detox eða hreinsun fyrir húðina.

„Ég elska góðar olíur og serum, fyrir mig skiptir það mestu máli og á alveg nokkrar tegundir en er ekki að nota þær allar í einu.“

Linda hugsar vel um húðina á öllum líkamanum og eru tvö mikilvæg atriði í þeirri húðumhirðu. Hún þurrburstar sig alla daga og ber svo kókosolíu á sig á eftir. Gaf hún einnig nákvæmar leiðbeiningar um það hvernig best væri að þurrbursta líkamann.

Nánari upplýsingar um uppáhalds vörur Lindu má finna í viðtalinu í spilaranum hér fyrir ofan.

Farðaði sig sjálf

Linda segir meðal annars í viðtalinu að keppendur í Miss World árið 1988 hafi getað látið farða sig og greiða sér á staðnum en sjálf afþakkaði hún þá þjónustu og fór sínar eigin leiðir.

„Ég hafði séð á æfingu daginn áður einhverjar stelpur sem voru málaðar og var ekki að fíla það þannig að ég ákvað að láta ekki mála mig.“

Hún farðaði sig því sjálf fyrir keppnina, sem hún endaði svo á að vinna og var krýnd fegursta kona heims. Hárgreiðsluna gerði hún þó ekki sjálf og þurfti að fara krókaleiðir til að fá greiðslu frá einhverjum sem hún þekkti og treysti.

„Hárgreiðslumeistarinn minn sem heitir Dúddi hann ferðaðist með mér, líka eftir að ég varð Miss World. Hann kom út á keppnina og þar var mikið „security“ en sá sem var yfir öryggisgæslunni hélt dáítið upp á mig svo við fengum að smygla Dúdda upp hæðina hjá mér til að gera hárið á mér fyrir keppnina og stelpuna sem var með mér í herbergi, Ungfrú Ísrael.“