Í beinni: RIG Digital motorsport

Margir af fremstu akstursíþróttamönnum landsins taka þátt, þar á meðal ríkjandi íslandsmeistari í Rallakstri 2020 Gunnar Karl Jóhannesson, og fyrrum formúlu 3 ökumaðurinn Kristján Einar Kristjánsson. Gert er ráð fyrir þátttöku nokkurra erlendra ökumanna.

Um er að ræða tvær 60 mín keppnir, ein á laugardag og önnur á sunnudag. Keppnin á laugardag er haldin á Le Mans brautinni í Frakklandi og ekið er á LMP2 bílum. Sunnudags-keppnin er keyrð á Mözdu MX5 bílum og óvenjuleg að því leyti að enginn ökumaður veit hvaða braut er ekið fyrr en æfing hefst á sunnudag.

Teningi er kastað og ein braut af 6 mögulegum stuttum brautum er valin. Sunnudagskeppninni er skipt í tvær 30 mín umferðir, og seinni keppni hefst í öfugri rásröð miðað við úrslit fyrri umferðar.

Æfingar hefjast báða daga kl. 16.00 og kappakstur á slaginu 18.00.

Um Digital-Mótorsport

Digital mótorsport, eða Hermikappakstur, er stafrænt form af kappakstri þar sem ekið er eftir alvöru brautum og bílum sem hafa verið settar í stafrænt form. Brautirnar eru flestar geisla-mældar svo að frávik frá smáatriðum brautarinnar eru innan við millimetra. Tækin sem notuð eru, eru hönnuð til að líkja eftir hegðun alvöru stýrisbúnaðar, bremsu og bensín pedala. Allt er gert til að stafrænn akstur líkist raun akstri sem mest. Margir af þekktustu ökumönnum okkar tíma taka nú þegar þátt í digital mótorsporti samhliða raunheimasportinu.