Fólk geti lent mjög ó­vænt í að­stæðum sem það kemst ekki úr ef það fer inn á svæðið

Hann segir ekki vitað hvar eða hvenær eldgos komi upp ef það byrjar að gjósa og því gæti fólk lent mjög óvænt í einhverjum aðstæðum sem það kæmist ekki úr ef það er að þvælast á svæðinu.

Veginum að Keili og öðrum slóðum á svæðinu var lokað í gær eftir að óróapúls mældist klukkan 14:20 við Litla Hrút við Keili. Virknin og óróinn er enn viðvarandi þótt það hafi aðeins dvínað í nótt.

Snemma í morgun færðist óróinn í aukana á ný og urðu til að mynda tveir stórir skjálftar á sjötta tímanum, annar 3,9 að stærð og hinn 4,0 að stærð.

„Þetta bara heldur áfram. Það voru fimm svona frekar stórir skjálftar í nótt þannig að atburðarásin heldur áfram. Við erum ennþá í svipaðri stöðu og í gærmorgun áður en þessi óróahrina kom,“ segir Víðir í samtali við Vísi.

Snúnara að flytja millilandaflugið norður út af Covid-19

Aðspurður um framhaldið í dag segir hann að stöðuga samráðsfundi framundan.

„Við erum byrjuð að tala saman, svo eru fundir hver á fætur öðrum til að tryggja samráðið og taka stöðuna. Vísindamenn, ráðamenn og aðgerðastjórnir, þeir sem eru að stýra aðgerðum á Suðurnesjum, höfuðborgarsvæðinu og Suðurlandi. Þannig að það eru ýmis plön í gangi. Við erum að heyra í Norðlendingum líka varðandi það ef það þyrfti að flytja flugið norður. Það eru bara allir að undirbúa sig fyrir hinar ýmsu uppákomur um allt land.“

Spurður nánar út í flugið segir hann undirbúninginn snúa að því ef svo ólíklega vildi til að það þyrfti að flytja millilandaflugið til Akureyrar og/eða Egilsstaða vegna eldgoss. Hlutirnir séu snúnari núna en venjulega vegna þeirra sóttvarnaráðstafana sem eru í gildi á landamærunum vegan Covid-19.

„Að öllu jöfnu þá væri þetta ekkert mál ef ein eða tvær vélar lentu úti á landi eins og gengur og gerist yfir veturinn. En vegna Covid-ráðstafana og landamærareglna þá þurfum við að vera búin undir það að geta framfylgt þeim, bæði á Egilsstöðum og Akureyri, menn eru bara að undirbúa sig undir það ef svo ólíklega vildi til. Það eru mjög litlar líkur á því en menn vilja vera tilbúnir,“ segir Víðir.

Hann segir að vísindaráð almannavarna muni funda þegar niðurstöður úr gervitunglamyndum sem teknar voru á svæðinu í gær liggja fyrir. Vonast er til að niðurstöðurnar komi fyrir hádegi í dag. Þá segist Víðir telja það mjög líklegt að boðað verði til blaðamannafundar í dag ef það verða einhver stærri tíðindi.

Gefa út leiðbeiningar ef það byrjar að gjósa hvar hægt verður að komast að

Víðir segir að eitthvað hafi verið um það í gær að fólk hafi verið að koma að veginum að Keili og viljað fara um svæðið eftir að búið var að loka því. Það hafi þó ekki komið upp nein vandamál.

„Á meðan við erum með þessa stöðu á þessu svæði að biðja fólk um að vera ekki að fara þarna inn. Við vitum ekkert 100 prósent hvar þetta kemur upp eða hvenær þannig að fólk getur lent mjög óvænt í einhverjum aðstæðum sem það kæmist ekki úr ef það væri að þvælast þarna inni á svæðinu,“ segir hann.

Það þurfi einfaldlega að bíða og sjá hvern þróunin verður.

„Um leið og við sjáum hvernig þetta þróast og ef það byrjar að gjósa þá munum við gefa út leiðbeiningar um hvar verður þægilegt að komast að ef menn vilja það. En á meðan þetta er svona mikil óvissa í þessu þá biðjum við fólk bara um að halda sig fjarri,“ segir Víðir og bætir við að þótt verið sé að horfa á einhvern tiltekinn stað eða örnefni þá sýni sagan að það sé alls ekkert öruggt að gos komi upp akkúrat þar.