Ekkert ferðaveður og Holtavörðuheiði lokað

Snjóþekja og stórhríð er á Steingrímsfjarðarheiði og ekkert ferðaveður. Ófært er á Klettshálsi og lokað á Þröskuldum og Dynjandisheiði að því er fram kemur á vef Vegagerðarinnar. Á sunnanverðri heiðinni, í Pennusneiðingnum og þar fyrir neðan, er mjög blautur og grófur vegur sem getur verið hættulegur litlum bílum.

Þungfært og skafrenningur og óvissustig vegna snjóflóðahættu er í gildi á Siglufjarðarvegi. Veginum verður lokað klukkan 16:30.

Hættustigi vegna snjóflóðahættu hefur verið lýst yfir í Ólafsfjarðarmúla í dag klukkan 16 í dag. Veginum hefur verið lokað síðan þá.

Liðsmenn KA/Þórs í Olísdeildinni í handbolta sneru við í Staðarskála eftir bíltúr frá Akureyri enda Holtavörðuheiði lokuð. Leik liðsins gegn HK í Kópavogi hefur verið frestað til morguns.

Á Norðausturlandi er víðast hvar snjóþekja eða hálka og töluverður skafrenningur. Lokað er vegna veðurs á Fljótsheiði. Á Austurlandi eru hreindýrahjarðir víða við veg og hafa meðal annars sést á Fagradal, við álverið á Reyðarfirði, í Álftafirði og Lóni. Sömuleiðis sást hreindýrahjörð á Breiðamerkursandi á Suðausturlandi.

Spáin er áfram slæm á vestanverðu landinu og um norðvestanvert landið. Er gul viðvörun í gildi á svæðinu þar til í fyrramálið og fram eftir degi á morgun á Vestfjörðum.