Hönnuðu svefngrímur úr flugfreyjuslæðum sem teknar voru úr umferð eftir samrunann

Flokk till you Drop sérhæfir sig í að finna leiðir til þess að endurnýta neytendavarning sem yrði annars bara að rusli. Teymið skipa Melkorka Magnúsdóttir, Rebekka Ashley Egilsdóttir og Berglind Ósk Hlynsdóttir. 

Þegar Air Iceland Connect og Icelandair runnu saman var allt í einu til lager af silkislæðum eftir Steinunni Sigðurardóttur. Icelandair hafði samband við HönnunarMars til að finna sjálfbæra lausn á þessu vandamáli. 

„Við vildum ómögulega henda þeim og því þurftum við að finna nýtt hlutverk fyrir þær. Það var því rökrétt og augljóst að hafa samband við íslenska hönnuði og leyfa þeim að finna leiðir til þess að nýta þessar slæður á nýjan hátt. Við ákváðum að leita ekki langt yfir skammt og settum okkur í samband við teymið hjá Hönnunarmars. Þar sem sjálfbærni er yfirskrift hátíðarinnar 2021 báðum við þær um ráð og þær voru fljótar til.“

HönnunarMars kom fyrirtækinu í samband við hönnunarteymið Flokk till you drop, sem við fjölluðum um hér á Vísi á HönnunarMars á síðasta ári. Þær settu í sjötta gír og ákváðu að sauma svefngrímur úr silkislæðunum.

„Íslendingar vita nú alveg að maí og júní eru bjartir og fagrir en stundum þurfum við bara smá aukabúnað til þess að sofa í gegnum næturbirtu miðnætursólarinnar. Svo er líka praktískt að nota svefngrímur um borð í flugvél. Þessar slæðusvefngrímur eru því einn liður í vegferð okkar að sjálfbærari ferðaiðnaði. Leiðin þangað er ekki augljós þegar búið er á eyju, en margt smátt gerir eitt stórt. Þetta verkefni er bara eitt af mörgum sambærilegum verkefnum sem við höfum ástríðu fyrir, enda deginum ljósara hversu mikilvæg sjálfbærni er fyrir alla,“ segir í tilkynningu frá Icelandair.

„Að notað sé nýtt er vissulega ljós punktur á þeirri vegferð.“

Á síðasta ári greindi Hönnunarteymið tonn af fatnaði frá Rauða krossinum til að sýna neyslumenningu Íslendinga. Afraksturinn var til sýnis á HönnunarMars árið 2020.  Sýningin var ádeila á úrelta orðatiltækið shop till you drop. Verkefnið var samstarfsverkefni Fatasöfnunar Rauða Krossins, Listaháskóla Íslands, Háskóla Íslands, og Textílmiðstöðvar Íslands og var styrkt af Nýsköpunarsjóði námsmanna.

„Markmiðið er að gefa fólki í landinu innsýn í það hvað þau eru að gefa í Rauða krossinn. Líka að gefa fólki innsýn í hvað það er að kaupa,“ sögðu þær um verkefnið sitt. 

Myndband um slæðuverkefni Flokk till you drop fyrir Icelandair má sjá í spilaranum hér fyrir neðan.