UNICEF sendir hjálpargögn á hamfarasvæði Filippseyja

UNICEF, Barnahjálp Sameinuðu þjóðanna áætlar að um 845 þúsund börn á hamfarasvæðum fellibylsins Rai á Filippseyjum þarfnist neyðaraðstoðar. UNICEF hefur brugðist við og sent nauðsynleg grunnhjálpargögn á vettvang meðan áframhaldandi mat er lagt á ástandið og þörfina.

Að sögn UNICEF er nauðsynlegt að tryggja næringu, vatn, lyf, föt, tímabundið skjól og viðbragðspakka við hamförum til heilbrigðisstofnana, svo fátt eitt sé nefnt.

„Hugur okkar er hjá börnunum og fjölskyldum þeirra sem lentu í fellibylnum. Fjölmörg börn munu verja hátíðunum í ár svöng, köld, án þaks yfir höfuðið og í áfalli. UNICEF vinnur að því að koma til móts við brýnustu þarfir þessa fólks ásamt stjórnvöldum og samstarfsaðilum á svæðinu,“ segir Oyunsaikhan Dendevonorov, fulltrúi UNICEF á Filippseyjum.