Davíð Már Bjarnason, upplýsingafulltrúi Landsbjargar, segir að björgunarsveitir hafi verið kallaðar út vegna mikils fjölda bíla á leiðinni til borgarinnar sem sé fastur.
Hann segir að svo virðist sem einhver hafi lent í vandræðum sem hafi orsakað það að mjög margir bílar sitji fastir.
Hellisheiði: Búið er að loka heiðinni. Opið er um Sandskeið og Þrengsli. #færðin
— Vegagerðin | Iceland Roads (@Vegagerdin) February 23, 2022
Snjóbíll og jeppar eru á leiðinni að austan á leiðinni upp á heiðina að sögn Davíðs. Hann segist ekki vita nákvæmlega í hverju vandinn liggi. Lítið þurfi til við aðstæður sem þessar. Mikill snjór hafi fallið í nótt og mikið fok í vindinum.
Fyrir klukkan 22 í gærkvöldi var búið að losa alla bíla sem festust í óveðrinu sem gekk yfir 21. og 22. febrúar. Flesta bílana var hægt að keyra af vettvangi en einhverja þurfti að draga.
