Starfs­maður Eflingar og frænka Sól­veigar sakar stjórnina um hræsni

Þetta skrifar Valgerður Árnadóttir,  starfsmaður Eflingar og frænka Sólveigar Önnu Jónsdóttir formanns félagsins, í færslu á Facebook. Valgerður hefur verið í veikindaleyfi síðan hún lenti í slysi síðasta sumar og skrifar í færslunni að hún hafi ekki ætlað að mæta aftur til starfa. Hún hafi hins vegar fengið uppsagnarbréf frá „lögmanni út í bæ“ klukkan tvö í nótt. 

„Mánuði eftir slysið mitt var mér tilkynnt að félags- og þróunarsvið sem ég starfaði hjá sem teymisstjóri félagsmála hefði verið lagt niður „vegna skipulagsbreytinga“ og mér var bboðið starf á öðru sviði, sem ég afþakkaði,“ skrifar Valgerður í færslunni, sem birtist í morgun. 

Segir félags- og þróunarsvið verið lagt niður til að búa til starf fyrir Viðar

Hún segir að stuttu eftir að félags- og þróunarsvið hafi verið lagt niður hafi skrifstofa félagsmála verið stofnuð innan Eflingar og Viðar Þorsteinsson verið gerður að yfirmanni þar. Skrifstofa hans og starfsfólk hafi þjónað sama tilgangi og félags- og þróunarsvið gerði fyrir skipulagsbreytingarnar. 

„Svo skipulagsbreytingin var nánast engin, nema til þess fallin að losa sig við sumt starfsfólk og setja Viðar yfir einingu sem hann myndi geta sætt sig við eftir að fjölda kvartanna í hans garð gerðu honum erfitt um vik að starfa áfram sem framkvæmdastjóri,“ skrifar Valgerður. 

Hún segist hafa stutt þær konur sem kvörtuðu undan „framgöngu og eineltistilburðum“ Viðars og hún hafi sjálf beðið Sólveigu Önnu um að standa með þeim líka. 

„En þá haðfi hún í stað þess að taka kvartanir þeirra alvarlega sagt upp þeim sviðsstjóra „sem þau töldu að ætti upptök af þeim kvörtunum.“ Ég reyndi að biðla til hennar að standa  með þeim konum sem alltaf hefðu staðið með henni, konur sem komu til starfa hjá Eflingu til að styðja við hennar baráttu og ég trúði því ekki að hún myndi bregðast þeim, en allt kom fyrir ekki,“ skrifar Valgerður. 

Hún segir að ekki hafi verið um að ræða starfsmenn fyrri stjórnar, eins og „þau Viðar hafa viljað halda fram.“ Þau hafi sjálf ráðið konurnar til starfa. 

„Ekki var um „plott fyrrum trúnaðarmanns Eflingar“ að ræða eins og þau hafa einnig haldið fram og ekki var um að ræða einhverjar „leifar af gamalli vinnustaðamenningu Eflingar“. Þetta er allt einfaldlega lygi og hefur það margoft komið í ljós bæði í viðtölum við starfsmenn og í úttekt sálfræðistofu á vinnustaðamenningunni,“ segir Valgerður. 

Segir engan græða á „farsanum“ sem hafi hafist í lok október

Hún segist vegna veikinda sinna og fjölskyldutengsla við Sólveigu Önnu ekki viljað tjá sig um málið hingað til. 

„En nú er nóg komið, ég starfaði fyrir Eflingu í þrjú ár fyrir slysið og leiddi með þeim baráttuna fyrir betri kjörum Eflingarfélaga. Ég heimsótti hundruði vinnustaða, var m.a. með umsjón yfir trúnaðarmannakosningum og verkfallsaðgerðm og kynntist fjölda félaga vel. Félaga sem ég svo mækldi með til trúnaðarstarfa hjá Eflingu, bæði í trúnaðarráð og stjórn, margt af þeim gegn þar embætti núna,“ skrifar Valgerður. 

Hún segir þessa félaga ekki skulda sér neitt en hún eigi erfitt með að mörg þeirra trúi því upp á starfsmenn Eflingar að hafa á annan hátt átt með atburðarrásina að gera en að kvarta undan framkomu yfirmanns. 

„Og vonað að Sólveig Anna myndi taka kvartanir alvarlega og standa með sínu starfsfólki sem sannarlega hafa staðið með henni. Það græðir enginn á þeim farsa sem hófst í lok október í fyrra, ekki starfsmenn og ekki félagsmenn Eflingar,“ segir Valgerður. 

„Ég er djúpt vonsvikin með stjórn og trúnaðarráð Eflingar og öll þau sem í blindni trúa eftiráskýringum sem standast ekki skoðun. Ég er stolt af því að starfa fyrir Eflingu og trúði því að okkar barátta væri réttlát og árangursrík fyrir félagsmenn. Vanvirðing við okkur starfsfólkið er fordæmalaus.“