Segir Ingu standa stolta með körlum sem lítillækki konur

Skilaboð Tómasar A. Tómasson, þingmanns Flokks fólksins, til vinar síns árið 2014 hafa ratað víða og var fjallað um í fjölmiðlum í gær. Tómas var þá staddur í Bangkok, höfuðborg Taílands, og sagði vini sínum frá samskiptum við konur í Taílandi. 

„Ein dásamleg 26 ára ca. 45 kg var að yfirgefa herbergið smokklaust. En byrjaði á nuddkonunni fyrr í dag, kvöldið er ungt, 20.21,“ sagði Tómas í skilaboðunum.

Vinur Tómasar birti skilaboðin á Facebook á dögunum og spurði hvort fólk vildi hafa svona mann á þingi. Hafa skilaboðin síðan farið í töluverða dreifingu manna á milli. Síðar í skilaboðunum, sem sjá má að neðan, segir Tommi ætla að „taka“ eina fyrir kunningja sinn.

Inga Sæland, formaður Flokks fólksins, sagði í Reykjavík síðdegis á Bylgjunni í gær að Flokkur fólksins stæði stoltur og einhuga við bak Tómasar. Hún sagðist orðlaus að skilaboðin væru til umfjöllunar en um leið að ekki væri hægt að líta fram hjá orðfari Tómasar.

„Við höfum óbeit á þessu orðfari. Þetta er ógeðslegt orðfar. Það verður ekki hægt að horfa fram hjá því.“

Málið væri afgreitt hjá flokknum sem stæði einhuga með Tómasi.

Málið snúist um viðhorf gagnvart konum

Ragna Sigurðardóttir, borgarfulltrúi Samfylkingarinnar, er meðal þeirra sem hafa gagnrýnt viðbrögð formannsins við skilaboðunum.

„Inga Sæland sér ekkert vandamál við það hvernig þingmaður hennar talar um konur. Hún vill meina að málið snúist um það með hverjum hann „sængar“ en ekki því viðhorfi sem hann lýsir gagnvart konum,“ segir Ragna í færslu á Facebook.

Ragna segir að þótt flokkurinn viðurkenni ekki orðfæri Tómasar þá virðist flokkurinn ekki kannast við þau viðhorf sem það lýsi.

„Djúpstæðri kvenfyrirlitningu. Kvenfyrirlitning er nefnilega vandamál í íslensku samfélagi. Orðfæri er ekki bara lýsandi fyrir viðhorf heldur er það valdatæki. Valdatæki sem karlmenn nota til að lítillækka konur, smætta þær, hlutgera. Það er ekki formanni stjórnmálaflokks sæmandi að aðhafast ekkert nema fordæma „orðbragðið“ þegar þingmaður hennar talar um konur eins og kjötstykki.“

Konan búi líklega við mikla fátækt

Ragna rifjar upp viðbrögð Ingu þegar tveir þingmenn úr Flokki fólksins töluðu um Ingu á Klausturbar fyrir fjórum árum. Upptaka náðist af samtali sex þingmanna á öldurhúsinu og varð uppi fótur og fit í samfélaginu.

„Þeir voru reknir úr þingflokknum. Nú er hins vegar um unga konu að ræða í Taílandi, ekki formann Flokks fólksins. Inga Sæland telur ekki ástæðu til að standa „þétt“ við bakið á henni. Né við bakið á þeim konum sem hafa verið lítillækkaðar með þessum hætti, kyngerðar og smættaðar. Hún segist þess í stað vera stolt af því að hann sé þingmaður Flokks fólksins.“

Ragna spyr hvaða skilaboð þetta sendi til samfélagsins, og þá sérstaklega til ungra kvenna?

„Hvaða skilaboð sendir það að þetta orðfæri, þau viðhorf sem það lýsir og það samfélagsmein sem hlutgerving kvenna er - hafi engar pólitískar afleiðingar?“

Það eitt sé að minnsta kosti ljóst að formaður Flokks fólksins standi með körlum sem lítillækki konur og velji að taka ekki raunverulega afstöðu gegn kvenfyrirlitningu þegar á hólminn sé komið. Þá bendir hún á að orðfærið lýsi sömuleiðis kynþáttafordómum auk þess sem telja megi líklegt að konan sem um ræði búi við mikla fátækt.