Náðir þú að pakka? Neyðarsöfnun UN Women fyrir konur og stúlkur á flótta

50 milljónir kvenna og stúlkna á flótta í heiminum

„Aldrei hafa fleiri verið á flótta í heiminum en í dag og er talið þar af séu um 50 milljónir kvenna og stúlkna séu á flótta vegna stríðsátaka, ofsókna eða náttúruhamfara samkvæmt tölum Flóttamannastofnunar Sameinuðu þjóðanna. Vegna stríðsins í Úkraínu eru svo um 8 milljónir einstaklinga sem hafa skyndilega þurft að flýja heimili sín. Af þeim sem flýja yfir landamæri eru um 90% konur, börn og jaðarsettir hópar,“ útskýrir María en markmið herferðarinnar er að vekja almenning til umhugsunar um þær afleiðingar sem stríð og átök hafa á líf kvenna og stúlkna og mikilvægi þess að taka mið af sértækum þörfum þeirra þegar neyðaraðstoð er veitt svo öryggi þeirra sé tryggt. 

Með því að senda smáskilaboðin KONUR á númerið 1900 má gefa 1900 krónur til aðstoðar konum og stúlkum á flótta. UN Women á Íslandi biðlar til almennings að styrkja samtökin sem nú starfa á vettvangi við erfiðar aðstæður á átakasvæðum víðsvegar um heiminn og veita kvenmiðaða neyðaraðstoð.

„Stríðsátök hafa ólík áhrif á líf fólks eftir stöðu og kyni. Karlmenn eru líklegri til að deyja í átökum, konur eru líklegri til að verða fyrir kynferðislegu ofbeldi og mansali. Samkvæmt gögnum UN Women hafa um 70% kvenna á átakasvæðum orðið fyrir kynbundnu ofbeldi. UN Women sérhæfa sig í að vera á vettvangi og beita sér fyrir sértækum þörfum kvenna og stúlkna á átakasvæðum,“ útskýrir María.

„Þegar fólk flýr heimili sín, hvort sem það er vegna átaka eða hamfara gefst lítill tími til að hugsa fyrir nauðsynjum. Til að vekja okkur til umhugsunar setjum við fram í þessari herferð dæmigerðan Íslending á leið í frí sem pakkar í rólegheitum og getur handvalið farangurinn sinn. 

En fólk sem stendur frammi fyrir ógn hefur ekki þennan tíma – hvað þá að hugsa fyrir nauðsynjum og margir þurfa einnig að skilja þungar töskur eftir á flóttanum, haldandi á börnum á handleggnum.

 Þess vegna skiptir starf UN Women svo miklu máli – því samtökin hugsa einmitt fyrir þessum nauðsynjum, tryggja að réttar upplýsingar um réttindi og hjálp séu aðgengilegar og huga að öllu sem getur aukið öryggi kvenna og stúlkna á flótta,“ útskýrir María. Hún segir aðstæður kvenna og stúlkna ekki tryggðar þó þær komist lifandi frá sjálfum átakasvæðunum. Annarskonar ógnir steðji að þeim í flóttamannabúðum og mannmergð.

Neyddar til að greiða fyrir húsaskjól með líkama sínum

„Við fáum hryllilegar lýsingar á aðstæðum frá UN Women-liðum á vettvangi. Konur og börn eru að hverfa í ringulreiðinni sem skapast á lestarstöðvum og í flóttamannabúðum, þegar þau eiga að vera komin í skjól. Þetta eru ekki öruggir staðir fyrir konur og stúlkur og hjálparsamtök þurfa að vera vakandi fyrir því. 

Þá sýna allar rannsóknir að konur eru oft þvingaðar til að greiða fyrir húsaskjól með líkama sínum í fjölda tilvika og við sjáum þetta gerast í stríðinu í Úkraínu. 

Rannsóknir sýna einnig að heimilisofbeldi eykst í stríðsátökum og þarfir kvenna og barna hvað varðar læknisaðstoð, aðgang að tíðavörum og lyfjum virðast falla milli þils og veggjar. Og svo er auðvitað gríðarlega mikilvægt að huga sérstaklega að barnshafandi konum og mæðrum með kornabörn.

„Við erum mjög bjartsýnar um að neyðarsöfnunin muni ganga vel sem er gríðarlega mikilvægt á þessum tímapunkti – það ríkir hrikaleg neyð og við henni verður að bregðast. En við erum líka mjög stolt af því að fara af stað með fræðsluherferð samhliða svo almenningur sjái það svart á hvítu hvers vegna kvenmiðuð neyðaraðstoð er nauðsynleg. Hver einasta króna sem safnast fer í starf UN Women og við vonum svo innilega að fólkið okkar hér heima taki vel á móti söfnuninni og sendi SMS henni tið stuðnings“

Samhliða söfnunarátakinu hefur UN Women opnað fræðsluvef þar sem hægt er að kynna sér aðstæður kvenna og stúlkna á flótta.