Sendiráðið, samsýning og listasmiðja

Hvernig er stemningin fyrir HönnunarMars?

Hönnunarmars er svo skemmtilegur tími, það er svo gaman að hittast og skoða fjölbreytta íslenska hönnun. Ég reyni að fara á allar þær sýningar sem ég kemst á! Stemmningin er svakalega góð og sem bónus er þetta er fyrsta hátíðin í smá stund sem covid er ekki að spila neitt hlutverk.

Hvernig leggst Design Diplomacy viðburðurinn í þig?

Mjög vel, ég er svo mikill aðdáandi Finnlands og finnskrar hönnunar. Ég bjó þar og vann þegar ég var í starfsnámi svo það er sérstaklega ljúft að fá að kíkja í sendiráðið.

Hefur þú tekið þátt í slíkum viðburði áður?

Já ég fór í sænska sendiráðið 2019 og það var mjög skemmtilegt.

Hver heldur þú að sé mesti munurinn á milli lista og hönnunar umhverfisins hér og þar?

Ég held að hönnun sé rótgrónari í öllu í þeirra daglegu lífi.

Eigið þið Laura Pehkonen mikið sameiginlegt sem hönnuðir?

Ég held að við eigum ýmislegt sameiginlegt, vinnum báðar með allskonar efnivið og vinnum frekar opið og frjálst.

Heldur þú að það verði eitthvað samvinnuverkefni sem komi út úr Design Diplomacy?

Hver veit!

Hefur þú áður farið í heimsókn til sendiherra?

Já ég fór í sænska sendiráðið 2019 það var mjög gaman, góðar snittur og skemmtilegur félagsskapur!

Hvar sækir þú þér innblástur?

Ég skoða alltaf mikið af bókum, á svolítið safn sjálf og svo fer ég á bókasöfn. Það eru einhverjar smá töfrar þar, innihald bókarinnar verður ferskt í hvert skipti sem maður skoðar þær með nýtt verkefni í huga.

Hefur sýningin Snúningur verið lengi í bígerð?

Snúningur er að vissu leyti búin að vera lengi í bígerð, þar sem þetta er framhald á nokkrum völdum verkefnum síðustu 10 ára. Svona skúffu hugmyndir! En sjálf framleiðslan hefur aðallega farið fram síðustu 8 vikur.

Hvaða viðburði verður þú með á sýningunni?

Það verður listasmiðja í Gerðarsafni í tengslum við sýninguna fyrir börn á laugardaginn 7.maí og leiðsögn og listasmiðja fyrir fullorðna á sunnudaginn 8.maí. Þar að auki tók ég þátt í Design Diplomacy í finnska sendiráðinu í dag og er einnig með í samsýningunni HÆ/HI sem er samsýning íslenskra og ameríska hönnuða frá vina borginni Seattle sem verður í Stak á hverfisgötu.