„Ég var ógeðslega svekktur“

Í veislum með Enrique Iglesias

Hreimur var gestur í Jákastinu hjá Kristjáni Hafþórssyni. Þar rifjaði hann upp tímann þegar hljómsveitin Land og synir var komin með annan fótinn til Ameríku þar sem sveitin ætlaði að „slá í gegn” úti í hinum stóra heimi. Strákarnir voru komnir með risa fimm plötu samning og skemmtu sér í veislum með fólki á borð við söngvarann Enrique Iglesias þegar allt breyttist skyndilega. 

11. september 2001

Það var hinn örlagaríka dag 11. september 2001 sem Hreimur átti að fljúga út og finna aðsetur fyrir hljómsveitina á New York svæðinu áður en þeir færu í tónleikaferð um fylkin. Þann dag fékk hann símtal um að hann væri líklega ekki á leiðinni út þar sem allt væri að fara úr skorðum í Ameríku. Þá keyrði hann upp í Stúdíó Sýrland: 

„Um leið og við löbbum þar inn að þá sáum við seinni flugvélina klessa á turninn og þá vissi ég það bara, þetta verður eitthvað maður.“

Fengu að eiga plötuna

Í kjölfarið leið nokkur tími þar sem þeir heyrðu ekkert frá sínum tengiliðum úti en þegar þeir höfðu samband var það til þess að rifta samningnum þar sem þeir töldu Ameríkana aðeins vilja Amerískt efni eftir árásina. Þeir fengu þó að eiga plötuna sjálfir sem hafði verið fjármögnuð og í vinnslu með fyrirtækinu svo hún endaði á því að koma út. Á henni voru til dæmis lögin If, Smile og Summer.

„Þetta var náttúrulega brjálæðislegt ævintýri allt saman en í dag þegar ég horfi til baka, auðvitað er ógeðslega langt síðan, en í dag þú veist ég hefði ekki viljað neitt öðruvísi skilurðu. Hlutirnir fóru eins og þeir fóru, ég var ógeðslega svekktur, ég vann aldrei almennilega úr því en alveg bara í tvö þrjú ár var ég alveg ugh,“ segir Hreimur um tímabilið sem fylgdi á eftir.

„Það fór sem fór en síðan bara halda menn áfram.“

Ein stór eftirsjá

Hreimur segist eiga eina eftirsjá frá þessu stóra ævintýri sem þessi tími var. Það var þegar hann var kallaður til á Armani viðburð og var kynntur fyrir Destiny's Child stelpunum þar sem drottningin Beyoncé var fremst í flokki. Jón Gísli vinur hans hafði beðið hann um að skila kveðju til hennar ef hann myndi rekast á hana áður en hann fór út og hann gleymdi að skila kveðjunni.

„Ég hitti Beyonce og gleymdi að skila kveðjunni, það er ein af stærstu eftirsjánum við allt þetta ævintýri“

Þáttinn má heyra í heild sinni hér að neðan en í honum talar hann meðal annars um lagið Vöðvastæltur, Eurovision ævintýrið sem hluti af Vinir Sjonna, Made in sveitin og öll þjóðhátíðarlögin sem hann hefur samið og flutt: