Störf æðstu ráða­manna Ís­lands á EM í knatt­spyrnu

Af þessu tilefni hafði blaðamaður samband við Ásmund Einar Daðason, íþróttamálaráðherra, til að forvitnast út í veru hans á Englandi vegna Evrópumeistaramótsins.

„Það að fara á leikinn var partur af starfinu sem íþróttamálaráðherra,“ sagði Ásmundur þegar blaðamaður spurði hvað hann hefði verið að gera á Englandi.

Inntur eftir nákvæmari lýsingu á störfum sínum sagði Ásmundur þau hafa falist í því að mæta á þriðja leik liðsins, „taka þátt í Fanzone og hitta fulltrúa KSÍ, með sama hætti og forsætisráðherra og forseti gerðu.“

Eins dags dagpeningar fyrir mat

Ásmundur nefndi jafnframt að forsætisráðherra hafi farið á fyrsta leikinn, forseti Íslands og menningarmálaráðherra hafi farið á annan leikinn og hann sjálfur hafi svo farið á þann þriðja.

Ásmundur svaraði játandi aðspurður hvort hann hefði fengið greidda dagpeninga á meðan hann var úti á Englandi en það hafi aðeins verið þennan eina dag sem hann studdi liðið. Þá benti hann blaðamanni á að ráðuneytið gæti gefið nákvæmari upplýsingar um dagpeningana. 

Mennta- og barnamálaráðuneytið, sem Ásmundur fer fyrir og nær yfir æskulýðs- og íþróttamál, svaraði fyrirspurn blaðamanns um dagpeningana. Í svarinu stóð að Ásmundur hefði fengið „eins dags dagpeninga að upphæð 15.072 kr. vegna leiks Íslands og Frakklands á EM kvenna í knattspyrnu 18. júlí sl.“

Ferð Ásmundar var þó ekki bara til opinberra erindagjörða. Hann gat slegið tvær flugur í einu höggi og nýtt Englandsdvölina í sumarfrí með fjölskyldu sinni þar sem þau ferðuðust um sveitir Englands á kanalbát.

Fór fyrir fylkingu og flutti ræðu

Eftir samtalið við Ásmund sendi blaðamaður fyrirspurnir á skrifstofur forsætisráðuneytis, menningar- og viðskiptaráðuneytis og embættis forseta Íslands. Skrifstofurnar voru misfljótar að svara enda mikið af starfsmönnum í sumarleyfum á þessum tíma en á endanum fékkst svar við öllum fyrirspurnum.

Í svari forsætisráðuneytisins við fyrirspurn blaðamanns stóð að forsætisráðherra hefði ferðast til Englands 8. júlí síðastliðinn í tengslum við ráðstefnu í Oxford-háskóla. Í kjölfar hennar hefði ráðherrann sótt leik landsliðsins gegn Belgíu í Manchester 10. júlí áður en hún hélt „heim til Íslands að kvöldi sama dags.“

Þá kemur fram í svarinu að ráðherrann hafi fengið greidda dagpeninga „í samræmi við reglur um greiðslu ferðakostnaðar og önnur starfskjör ráðherra.“

Ekki kemur fram hvað Katrín Jakobsdóttir, forsætisráðherra, gerði úti á Englandi en eflaust hafa skyldur hennar verið svipaðar og hjá hinum þremur: fara á stuðningssvæðið fyrir leikinn, hitta fulltrúa KSÍ og styðja landsliðið úr stúkunni. 

Forsætisráðherrann fór allavega fyrir fylkingu íslensks stuðningsfólks ásamt Vöndu Sigurgeirsdóttur, formanns KSÍ, auk þess sem hún hélt ræðu fyrir íslenska stuðningsmenn á stuðningssvæðinu fyrir leik. 

Heimsókn á bækistöðvar og hádegisverður með leikmönnum

Í svari frá embætti forseta Íslands kemur fram að forsetinn hafi haldið til „Manchester á Englandi til að fylgjast með leik kvennalandsliðs Íslands á Evrópumótinu í knattspyrnu.“

„Hann heimsótti einnig bækistöðvar liðsins fyrir viðureign þess, snæddi þar hádegisverð og ræddi við leikmenn, þjálfara og starfslið. Þá veitti hann viðtöl við innlenda og erlenda fjölmiðla,“ stendur jafnframt í svarinu.

Að lokum stendur að í „utanferð af þessu tagi“ fái forsetinn dagpeninga. Hins vegar kemur ekki fram hve háir þeir eru nákvæmlega eða hvaða kostnaðarliði þeir ná yfir.

Heimsókn til liðsins, lestrarátak og menningarkynningar

Í svari menningar- og viðskiptaráðuneytisins segir að Lilja Alfreðsdóttir hafi sótt leik Íslands og Ítalíu þann 14. júní síðastliðinn. Auk þess að taka þátt í „dagskrá á vallarsvæðinu fyrir leikinn heimsótti ráðherra landsliðið og hitti stjórn KSÍ ásamt forseta Íslands á hóteli liðsins.“

Hún hafi einnig sótt „íslenska menningarkynningu sem haldin var í Manchester af tilefni af þátttöku Íslands í Evrópumeistaramótinu.“ Ráðuneytið hafi staðið fyrir menningarkynningum á mótinu í samstarfi við sendiráð Íslands í Lundúnum „eftir að ríkisstjórnin ákvað að verja fjármunum í að halda þær líkt og hefur verið gert á undanförnum stórmótum sem Ísland hefur tekið þátt í.“

Jafnframt stóð ráðuneytið fyrir lestrarátakinu Lesum í leikinn sem var haldið í tilefni mótsins og miðaði að því að örva sumarlestur barna með því að fá þau í „landsliðið í lestri“.

Loks kemur fram í svarinu að ráðherrar fái ekki „fulla dagpeninga eins og aðrir ríkisstarfsmenn, heldur einungis þann hluta þeirra sem ná yfir fæði og annan kostnað“ en gisting sé greidd samkvæmt reikningi. Ráðherra hafi því fengið þann hluta dagpeninganna greidda.