„Þurftum að hafa fyrir hverju einasta marki“

„Ég er bara glaður. Þetta er hrikalega flottur sigur og þetta var erfitt,“ sagði Snorri Steinn eftir sigur Vals gegn Benidorm í kvöld.

„Það er heitt og læti í höllinni þó það sé ekki uppselt og bara erfitt lið að eiga við. Það er óþægilegt þegar lið spila svona mikið sjö á sex og Alexander [Örn Júlíusson] fær rautt snemma og svo Oggi [Þorgils Jón Svölu Baldursson].“

„Þannig að við þurftum að grafa aðeins dýpra. En Bjöggi er náttúrulega geggjaður í markinu og kannski að sama skapi er markvarslan ekki eins góð hinumegin. En við þurftum að hafa fyrir hverju einasta marki.“

„Mér fannst við gera ágætlega í þessu sjö á sex dæmi. Auðvitað fengu þeir færi og leikurinn hefði verið allt öðruvísi ef Bjöggi hefði ekki varið svona svakalega. Mér fannst við svona nokkuð agaðir því það er auðvelt að detta í kannski 15-20 tæknifeila á móti svona aggresívri vörn og þeir eru þvílíkt góðir að koma á blindu hliðina þannig mér fannst við gera það vel.“

Leið vel á móti sjö á sex

Eins og Snorri segir spiluðu heimamenn stóran hluta leiksins með sjö menn í sókn gegn sex varnarmönnum Vals. Þrátt fyrir að það hafi oft á tíðum gert Valsmönnum erfitt fyrir gaf það liðinu einnig nokkur auðveld mörk í autt markið. Snorri vill þó ekki leggja dóm á það hvort þetta hafi verið góð ákvörðun hjá heimaliðinu að halda áfram í sjö manna sóknarleik.

„Ég ætla ekkert að dæma um það. Ég skal alveg viðurkenna það að sérstaklega eftir að Alexander fékk rautt þá leið mér alveg ágætlega með þá í sjö á sex og það sást alveg þegar þeir fóru í sex á sex að þeir eru gríðarlega sterkir maður á mann. Það er lítið eftir af leiknum og þeir héldu bara áfram að tæta okkur og það liggur við að höfum verið í meira brasi með það. Þannig ég veit ekki hvort þetta hefði þróast eitthvað með öðrum hætti, en það getur vel verið.“

Ekki hans að hafa skoðun á klukkunni

Það vakti athygli áhorfenda að leikklukkan í húsinu var nokkuð frumstæð og gat meðal annars ekki sýnt hversu mikið var eftir af brottvísunum leikmanna. Snorri segir það sérstakt að svo sé þegar komið er í riðlakeppni Evrópudeildarinnar.

„Það er mjög sérstakt. Sérstaklega miðað við undirbúninginn og stressið sem við fórum í gegnum.“

„Ég bjóst við þessu, ég skal alveg viðurkenna það. Og ég nefndi þetta við drengina á æfingu. Við sáum alveg í hvað stefndi þegar við æfðum hérna, en EHF [evrópska handknattleikssambandið] verður bara að taka á þessu. Það er í einhverju „protocol-i“ að ef þú ferð ekki eftir einhverjum reglum þá færðu sekt og eitthvað slíkt og við erum logandi hræddir við það því kostnaðurinn er orðinn nógu mikill,“ sagði Snorri og hló.

„Þannig að við erum allavega búnir að koma hérna og sjá að umgjörðin heima er geggjuð. Við þurfum ekki að hafa áhyggjur af þessu meira.“

„Geng út frá því að við getum sett eitthvað áhorfendamet í Origo-höllinni“

Næsti leikur Vals í Evrópudeildinni er gegn þýska stórliðinu Flensburg þann 22. nóvember í Origo-höllinni. Landsliðsmaðurinn Teitur Örn Einarsson leikur með þýska liðinu og Snorri vill að sjálfsögðu sjá fulla höll.

„Ég vill fá sneisafulla höll. Ég bara veit að hún verður það og það kæmi mér ekki á óvart ef miðasalan tæki aftur kipp. Hún tók náttúrulega kipp eftir Ungverjaleikinn þannig hún tekur væntanlega kipp aftur og ég geng út frá því að við getum sett eitthvað áhorfendamet í Origo-höllinni.“

„En það kemur smá pása í þessu núna og nú veðrur þetta smá kúnst. Nú þurfum við að setja fókusinn aðeins á deildina og gera það vel það verði skemmtilegra að spila á móti Flensburg,“ sagði Snorri að lokum.