Nýtt Sportveiðiblað á leiðinni

Besta leiðin til að láta tímann líða er til dæmis að hnýta flugur, horfa á veiðiþætti og auðvitað setjast niður og lesa gott veiðiblað. Sportveiðiblaðið hefur glatt marga veiðimenn í gegnum árin og núna er að koma út blað fyrir jólinn sem eins og venjulega er stútfullt af skemmtilegu lesefni fyrir veiðimenn.

Meðal efnis er viðtal við Jóa Fel en hann þekkja líklega flestir landsmenn af ljúfengum brauðum, kökum og nú síðast pizzum en Jói er mikill veiðimaður og hefur það sem reglu að veiða bara það sem hann borðar. Halldór Jörgenson skrifar skemmtilega veiðisögu af fjölskylduferð í Laugardalsá, Brynjar Þór Hreggviðsson er í viðtali en hann hefur komið víða við á sínum veiðiferli og er í dag sölustjóri veiðileyfa í Norðurá en hana þekkir hann eins og lófann á sér. Binni eins og hann er kallaður er jafnvígur á stöng og skotvopn og segir skemmtilega frá sínum veiðidögum. 

Árni Baldursson segir frá Bjarndýraveiðum í Kanada, Páll Ketilsson skrifar um veiðiferð í Eldvatn og eins er frábær veiðisaga af hressum konum sem fóru til Grænlands í sumar. Í blaðinu er líka ítarleg veiðistaðalýsing um Stóru Laxá en áin sú er að koma sterk inn hjá hóp sem heldur upp á þessa á eins og enga aðra. Þetta er bara rétt brot af því sem er í blaðinu svo það er af nógu að taka þegar þú grípur blaðið á næsta sölustað.