Tafir á komu dæluskips ógna tugmilljóna tekjum Ísafjarðarbæjar

Tekjur Ísafjarðarbæjar af skemmtiferðaskipum hafa aukist mikið á undanförnum árum, að undanskyldum covid árunum að sjálfsögðu. Hundrað og átján skip komu til bæjarins á þessu ári en samkvæmt bókunum má reikna með rúmlega 240 skipum á næsta ári.

Arna Lára Jónsdóttir bæjarstjóri Ísafjarðarbæjar segir að undanfarin ár hafi verið unnið að stækkun Sundahafnar til að hægt verði að taka á móti fleiri og stærri skemmiferða- og flutningaskipum í einu. Búið væri að reka niður stálþil til að lengja hafnarkantinn.

„Þetta er nýr kantur upp á 300 metra þannig að við getum tekið á móti stærri skipum. Sem mun náttúrlega skipta okkur gríðarlega miklu máli. Þetta er tekjuverkefni sem skiptir máli fyrir höfnina og fyrir samfélagið allt,“ segir Arna Lára.

Bærinn er með samning við Björgun og samkvæmt honum átti nýtt dæluskip félagsins að koma til Ísafjarðar í sumar til að dýpka röstina við Sundahöfn. Hluti efnisins átti að fara í gerð hafnarkants í pollinn fyrir innan stálþilið.

„Þannig að þau getið komið hingað sem rista dýpra, að við getum tekið stærri skip að landi og þau þurfi ekki að vera hér í minni fjarðarins og koma inn með fólk á smábátum. Geti komið inn og lagst að bryggju. Þar fáum við náttúrlega mestu tekjurnar.“

Einmitt, greitt hafnargjöld?

„Já, nákvæmlega,“ segir bæjarstjórinn.

Tekjurnar af skemmtiferðaskipunum skipti bæjarfélagið miklu máli. Þær hafi verið um 200 milljónir á þessu ári en gætu skilað ríflega 300 milljónum á því næsta.

„Það skilar sér auðvitað út í allt samfélagið. Það eru líka fyrirtæki hér í bænum sem njóta góðs af þessum skipum og farþegum þeirra,“ segir Arna Lára.

Síðast fyrir um hálfum mánuði hafi dýpkunarskip Björgunar lokið verkefni í Arnarfirði og verið á leið í Skutulsfjörðinn þegar því var skyndilega siglt í Landeyjarhöfn. Hafnargerðinni verði að ljúka vel fyrir næsta sumar enda skemmtiferðaskip bókuð langt fram í tímann.

„Við gerum ráð fyrir þessum tekjum næsta sumar. Þannig að við verðum að láta dýpka.“

Hvaða svör eruð þið að fá frá Björgun?

„Ég held að það sé nú Vegagerðin sem stýrir þessu. Þeir álíta að Landeyjarhöfn sé mikilvægari en þetta verkefni. Því er ég auðvitað algerlega ósammála. Þeir eru með höfnina í Þorlákshöfn en við þurfum að fá þetta efni. Það er ekki útséð með það og verið að leita allra leiða til að fá jafnvel annað skip til dýpka fyrir okkur,“ segir Arna Lára Jónsdóttir.