Anna Svava og Gylfi Þór setja ein­býlið í Norður­mýrinni á sölu

Hjónin reka ísbúðina Valdísi en rekstur ísbúðarinnar hefur gengið vel undanfarin ár. Þá hefur Anna Svava skemmt landanum reglulega á sjónvarpsskjánum með húmorinn að vopni.

Húsið var teiknað af Sigurði Guðmundssyni arkitekt árið 1939. Af 304 fermetrum er bílskúr upp á 57 fermetra. Fram kemur í lýsingu á eigninni að hún sé mikið endurnýtt með myndarlegum afgirtum garði þar sem er að finna sólpall og heitan pott.

Fimm svefnherbergi eru í húsinu og fjögur baðherbergi svo enginn ætti að þurfa að bíða eftir því að komast á klósettið.

Fjölmargar myndir og frekari lýsingu má finna á fasteignavefnum.