Markahæsti leikmaður Liverpool eftir HM spilar í vörninni hjá Leicester

Liverpool steinlá 3-0 á móti Úlfunum um helgina, liði sem var tólf stigum og átta sætum fyrir neðan þá fyrir leikinn.

Fyrir vikið hefur Liverpool liðið nú aðeins náð í eitt stig í síðustu fjórum deildarleikjum sínum auk þess að detta út úr ensku bikarkeppninni þar sem liðið hafði titil að verja.

Vörnin hefur náttúrulega verið til vandræða ekki síst eftir að Virgil van Dijk meiddist og miðjan er upphrópuð sem vandamál númer eitt. Það sem er kannski þó sorglegast við gengi Liverpool er að sóknarmenn liðsins eru alveg bitlausir líka.

Þetta sést ekki síst á sláandi tölfræði sem Sky Sports tók saman og birti eins og sjá má hér fyrir neðan.

Liverpool liðið hefur nú spilað sex leiki frá því að enska úrvalsdeildin hófst á ný eftir hlé vegna heimsmeistarakeppninnar í Katar.

Þetta byrjaði reyndar ágætlega með 3-1 sigri á Aston Villa og 2-1 sigri á Leicester en síðan er uppskeran aðeins eitt stig samtals og eitt mark samtals í fjórum síðustu deildarleikjum sem voru allt leikir á móti liðum í áttunda sæti eða neðar.

Liverpool hefur skorað samtals sex mörk í leikjum sex eftir HM og enginn leikmaður liðsins hefur skorað fleiri en tvö mörk í þessum leikjum.

Það gerði aftur á móti Wout Faes, varnarmaður Leicester City í leik Liverpool og Leicester á Anfield.

Liverpool leikmennirnir skoruðu ekki í leiknum en unnu engu að síður 2-1 sigur á Leicester City þökk sé tveimur sjálfsmörkum Faes með sjö mínútna millibili í fyrri hálfleiknum.

Þessi leikur var 30. desember síðastliðinn en síðan þá er Alex Oxlade-Chamberlain sá eini sem hefur fundið leiðina í mark mótherjanna.

Frá því að Oxlade-Chamberlain minnkaði muninn í 2-1 í 3-1 tapi á móti Brentford þá hefur Liverpool ekki skorað deildarmark í 310 mínútur. 3-0 tap á móti Brighton, 0-0 jafntefli við Chelsea og loks 3-0 tap á móti Wolves um helgina.

Þetta mark hjá Oxlade-Chamberlain er líka eina markið sem leikmenn sjálfir Liverpool hafa skorað í síðustu fimm deildarleikjum liðsins.