„Mín kjánalegu mistök fóru með þetta“

Brighton skoraði eina mark leiksins úr vítaspyrnu á áttundu mínútu í uppbótartíma. Alexis Mac Callister skoraði af öryggi úr vítinu.

Vítið var dæmt eftir að hornspyrna Brighton mann fór í hendina á Manchester United manninum Luke Shaw.

„Síðasta mínútan og í raun það síðasta sem gerðist í leiknum. Ég fékk boltann aðeins í mig en auðvitað átti hendin mín ekki að vera þarna,“ sagði Luke Shaw við Sky Sports eftir leikinn.

„Mín kjánalegu mistök fóru með þetta. Ég tek ábyrgðina á þessu sjálfur. Þetta kostaði okkur leikinn og það er erfitt að sætta sig við þetta. Ég get samt ekki útskýrt af hverju höndin mín var þarna,“ sagði Shaw.

„Kannski fór höndin mín meira upp af því að boltinn fór í hana en hún átti samt aldrei að vera þarna,“ bætti Shaw við.

United er tveimur stigum á eftir Newcastle United og fjórum stigum á undan Liverpool. Liverpool hefur hins vegar leikið einum leik meira.

„Þetta breytir engu. Þetta er enn í okkar höndum. Við verðum að rífa okkur aftur upp. Liðin í kringum okkur eru að ná í stig en við eigum enn leik inni og þetta er því undir okkur komið,“ sagði Shaw.