Vorveiðin í Elliðaánum hafin

Urriðinn er mest á svæðinu frá Símastreng og upp að Höfuðhyl en sá veiðistaður er að öllu jöfnu gjöfulastur á hverju vori. Það getur legið mikið af urriða í efri hluta Höfuðhyls en líka alveg niður að gömlu brúnni og þar fyrir neðan. Þetta er fiskur í ætisleit og það er þess vegna langsamlega best að nota mjög litlar púpur og þurrflugur andstreymis og reyna eftir fremsta megni að koma mjög varlega að veiðistaðnum og láta fara lítið fyrir sér.

Mánudagsmorguninn 1. maí voru feðginin Gísli og Fanndís að veiðum í Elliðaánum, þau lönduðu sjö fiskum og stærsti var 55 cm sem Fanndís setti í og landaði alveg sjálf (sjá mynd). Flestir fiskarnir voru teknir í Höfuðhyl og allt á púpur, Blóðorm og Pheasant tail, að sögn Gísla var kalt um morguninn en stillt, svo kom sólin og þá fór allt að gerast.