„Nautið kom alltaf á fleygiferð“

Boði Logason skrifar 21. maí 2023 07:01

Nautið átti sér enga drauma um fyrirsætustörf eins og RAX fékk að kynnast. RAX

Á einni af ferðum sínum um Færeyjar kom RAX auga á skjöldótt naut sem hann langaði að mynda. Það stóð við mosagróinn hlaðinn vegg og RAX sá fyrir sér mynd þar sem það liti út fyrir að vera hluti af veggnum. Nautið átti sér hins vegar enga drauma um fyrirsætustörf og brást hið versta við og reyndi að stanga RAX sem flúði upp á vegginn þar sem hann mátti dúsa í hálftíma.

„Ég komst ekkert niður, nautið elti mig út um allt og kom upp undir vegginn og horfði á mig.“

Loksins kom bóndinn sem átti nautið, ásamt vini sínum, og nýttu þeir tækifærið þar sem þeir voru einir og laumuðust í ákavítisflösku. Vinurinn var hins vegar enginn sérlegur vinur nautsins sem reyndi að stanga hann svo hann þurfti að flýja upp í bát sem stóð við vegginn. RAX náði skemmtilegum myndum af öllu saman þar sem hann húkti uppi á veggnum.

„Viðareiði heitir þessi staður og þetta er eins og allt þarna, fallegt.“

Myndirnar af mannýga nautinu má sjá í nýjasta þætti RAX Augnablik í spilaranum hér að neðan.

Klippa: RAX augnablik - Nautið kom alltaf á fleygiferð

Hér fyrir neðan má sjá fleiri þætti úr smiðju RAX.

Árið 1996 varði RAX nokkrum dögum í hinni fallegu en afskekktu eyju Mykinesi í Færeyjum. Sá sem hafði lofað honum gistingu var farinn í land þegar RAX mætti til eyjarinnar og hann þurfti að bjarga sér sjálfur og lifði á rófum þar sem það var engin verslun á eyjunni. Þarna kynntist RAX Bjarna Hansen sem átti eina kú sem hann hleypti út á morgnana og átti svo í eilífri baráttu við að koma aftur heim í hús seinni partinn. RAX hreifst af þessu og myndaði hina kostuglegu baráttu Bjarna og kýrinnar.

Árið 1988 var RAX í Færeyjum og langaði að heimsækja þorpið í Nólsey sem er beint á móti Þórshöfn. Í Nólsey er eins og maður stígi aftur í tímann og RAX myndaði lífið í þessu notalega þorpi sem var fullt af skemmtilegum týpum.

Árið 1989 fó RAX út í eyjuna Sandey því hann hafði heyrt af manni þar, Jónasi Madsen, sem spilaði á munnhörpu fyrir dýrin sín. Þegar RAX bar að garði var Jónas úti á túni að spila fyrir hrossin sín og folald eitt var hjá honum að dansa. RAX stökk út úr bílnum til þess að ná þessu augnabliki á mynd og spjallaði svo við hinn einstaka Jónas.

Í þáttunum RAX Augnablik segir ljósmyndarinn Ragnar Axelsson sögurnar á bak við margar af sínum þekktustu myndum. Ragnar hefur starfað á vettvangi í meira en fjörutíu ár og eru sögurnar hans ævintýralegar. Nýr þáttur kemur út á hverjum sunnudegi hér á Vísi og á Stöð 2+.

Hægt er að sjá alla þættina hér á Vísi.

RAX Ljósmyndun

Tengdar fréttir

Brotlentu á Eiríksjökli

Tveir Bretar ætluðu að fljúga yfir Eiríksjökul á leið sinni til Grímseyjar árið 1984 en flugu á jökulinn og brotlentu á honum í kjölfarið. Hannes Hafstein, sem stýrði Slysavarnarfélaginu á þessum tíma, bað RAX að reyna að ná myndum af slysstað. RAX flaug af stað en þegar hann kom að flakinu leist honum ekki á blikuna.

14. maí 2023 07:00

Brotlentu á Eiríksjökli

14. maí 2023 07:00

Bílarnir sem Kaninn skildi eftir

Að ramba á stað sem eitt sinn iðaði af lífi en er nú í eyði er sérstök upplifun. Ikatek flugvöllur á Grænlandi er þannig staður. Hann var byggður af Bandaríkjaher í seinna stríði og notaður sem varaflugvöllur þar sem flugvélar á þessum slóðum gátu fengið olíu. Bílar, olíutunnur og leifar af flugskýlum og skálum standa á svæðinu innan um tignarleg fjöllin í kring og hafa ekki verið hreyfð eða notuð frá því að stríðinu lauk.

7. maí 2023 07:01

Fólk stofnar fyrirtæki með aðstoð Íslendinga

Alls staðar á hnettinum erum við mannfólkið að kljást við það sama, að búa okkur til lífvænleg skilyrði. Að koma þaki yfir höfuðið, hafa öruggt aðgengi að mat, og hafa tækifæri til að afla sér tekna.

30. apríl 2023 07:02