Júlíspá Siggu Kling: Ástin blómstrar hjá Steingeitinni

Sigga Kling skrifar 7. júlí 2023 06:00

Elsku Steingeitin mín, þetta er þinn mánuður hann byrjaði á fullu tungli í þínu merki þann þriðja júlí. Þessi mánuður er tákn endurnýjunar, hreinsunar og umskipta, það mun verða gerður einhver sterkur sáttmáli.

Steingeitin er frá 22. desember til 19. janúar.

Þú ert að átta þig á því hvað þú ert frábær þó að síðustu 12 mánuðir hafa verið eins og hvirfilvindur þá hefur þetta verið til þess að þú fáir betra og bjartara líf. Ástin blómstrar hjá þér því að það gæti verið að þér dytti það jafnvel í hug að dekra við ástina þína þó að það sé ekki afmæli eða eitthvað sem þér finnst þú vera skyldugur til að gera. Þetta tengist líka þínu nánu vinum, gerðu meira en þú þarft.

Allavega aðeins betra og meira en þú þarft. Tölurnar 13 og 3 birtast gæti verið tengt dögum, eins birtast tölurnar 17 og 21 sem er tákn fyrir júlí mánuð, allar tölurnar eru tengdar dögum. Þessir dagar eru sérstaklega sterkir til þess að láta slag standa, þeir eru líka sterkir vegna þess að óvæntar aðstæður verða í kringum þig en það er samt alveg sama hvað gerist þú sekkur aldrei.

Ef þú finnur fyrir þreytu eða sleni þá skaltu skoða hvað þú ert að borða hvort að þú sért með óþol, hvort þú þolir þennan mat, þennan drykk eða þetta lyf. Vertu eins opin og þú getur við að lifa hvern dag eins og hann væri sá síðasti. Þetta tímabil skapar svo margar minningar að merkilegra getur það vart orðið í bili.

Ekki fljóta í fýlu þó aðrir vilji ekki fara sömu leið og þú. Það verða líka góð ráð fólgin í dómgreind þinna nánustu því stundum eru manni send skilaboð frá alheimsorkunni í gegnum lifandi fólk, bókstaflega þýðir orðið engill, sendiboði.

Knús og kossar

Sigga Kling