Það snýst svo í austan fimm til þrettán metra á sekúndu og þykknar upp sunnanlands í kvöld með smá vætu syðst. Hiti verður á bilinu fimm til átján stig, hlýjast suðvestanlands.
Í hugleiðingum veðurfræðings á vef Veðurstofunnar segir að austur við Noreg sé nú víðáttumikil og djúp lægð, sem hafi valdið úrhellisregni og stórtjóni í Noregi og Svíþjóð. Hún hreyfist norðvestur á bóginn, en komi lítið við sögu hér á landi og valdi varla nema með strekkings norðvestanátt og smá vætu við norðausturströndina í dag.
„Önnur álíka öflug lægð langt suðvestur í hafi mun hafa nokkru meiri áhrif, en hún þokast norðaustur og veldur vaxandi austanátt sunnantil í kvöld og rigningu þar í nótt. Á morgun og föstudag er lægðin djúpt suður af landinu og austanáttin heldur velli með smá vætu sunnan- og vestantil, en lengst af þurrviðri á Norðausturlandi,“ segir á vef Veðurstofunnar.
Veðurhorfur á landinu næstu daga
Á fimmtudag: Austan og norðaustan 8-15 m/s, hvassast við suðurströndina, en hægari norðaustantil. Dálítil væta sunna- og vestanlands framan af degi, en annars skýjað með köflum og þurrt að mestu. Hiti 10 til 19 stig, hlýjast á Suðurlandi.
Á föstudag: Austan- og norðaustan 8-15 m/s, hvassast syðst. Rigning víða um land, en úrkomulítið norðan heiða. Hiti 12 til 20 stig, hlýjast inn til landsins.
Á laugardag: Fremur hæg norðaustlæg átt og skýjað að mestu, lítilsháttar væta syðra en þokusúld úti við norður- og ausutrströndina. Hlýtt í veðri, einkum inn til landsins.
Á sunnudag og mánudag: Hæg norðlæg eða breytileg átt. Skýjað með köflum, en stöku skúrir inn til landsins og líkur á þokulofti við sjávarsíðuna um kvöldið. Hlýtt víða um land, en heldur svalara fyrir norðan og austan.
Á þriðjudag: Útlit fyrir suðlæga átt, þurrt að mestu og áfram hlýtt í veðri.
