Selja veiðileyfi til styrktar félagi krabbameinssjúkra barna

Þetta er mjög gott framtak og Veiðivísir vill hvetja alla þá sem vilja láta gott af sér leiða um leið og þeir skella sér í dagstúr í eina af bestu ám landsins að skella sér á einn dag. Hér er tilkynning frá Veiðifélaginu Kolskeggur:

„Við hjá Kolskegg/ASP vildum láta gott af okkur leiða og höfum ákveðið að öll sala veiðidaginn 13.10. næstkomandi í Eystri Rangá renni óskipt til Styrktarfélags krabbameinssjúkra barna.

Árlega greinast um 12-14 börn á Íslandi með krabbamein og það þarf ekki að taka fram hvílíkt reiðarslag það er fyrir barnið, fjölskyldu og vini. Styrktarfélag krabbameinssjúkra barna styrkir fjölskyldur þessara barna og er sá stuðningur ómetanlegur fyrir þær fjölskyldur sem lenda í þessum hremmingum.

Hér má lesa sér til um félagið: https://www.skb.is/

Við vonum að þið takið vel í að kaupa veiðileyfi til styrktar SKB. Ef allar tólf stangir seljast getum við styrkt félagið um 540.000 krónur.“