Norð­læg átt og hlýjast sunnan­til

Í hugleiðingum veðurfræðings kemur fram að það verði léttskýjað víða um land, en skýjað austantil og sums staðar skúrir þar fram eftir degi.

Hiti verður víða þrjú til ellefu að deginum og verður hlýjast sunnantil á landinu í dag, en norðaustanlands á morgun.

Á morgun verður hæðarhryggurinn kominn yfir Austurland og snýst þá vindur til suðlægrar áttar.

„Dáliltar skúrir vestantil, en bjartviðri eystra. Milt veður að deginum, en líkur á næturfrosti, einkum inn til landsins. Lægð á Grænlandshafi, nálgast landið á miðvikudag. Gengur því í austankalda með rigningu öðru hvoru, en mun hægara og þurrt fyrir norðan og hlýnar dálítið,“ segir á vef Veðurstofunnar.

Veðurhorfur á landinu næstu daga

Á þriðjudag: Suðvestlæg eða breytileg átt, 3-8 m/s og yfirleitt bjartviðri, en dáliltar skúrir vestantil, einkum síðdegis. Hiti 5 til 11 stig að deginum, en nær frostmarki yfir nóttina.

Á miðvikudag: Austlæg átt, 8-13 m/s, með súld eða dálítil rigning öðru hvoru, en mun hægari og bjart með köflum norðantil. Hiti 7 til 12 stig yfir daginn.

Á fimmtudag: Norðlæg eða breytileg átt, 3-8 m/s og skýjað með köflum, en lítilsháttar væta suðaustantil. Milt veður.

Á föstudag: Hægviðri, skýjað með köflum og smávæta á stöku stað. Áfram milt veður.

Á laugardag: Vaxandi suðaustanátt með rigningu sunnan- og vestnlands um kvöldið og hlýnandi veður.

Á sunnudag: Útlit stífa suðaustanátt með talsverðri rigningu og hlýindum.