Rooney blæs á sögusagnir um háar launakröfur

Slúðurblöð í Bretlandi greindu frá því í vikunni að Rooney yrði greitt £1,5 milljónir árlega, þrefalt meira en forveri hans í starfi, John Eustace. Rooney segir sögusagnir um háar launakröfur sínar vera algjöran þvætting og þvertekur fyrir það að seðlar hafi stýrt ákvörðun hans um að taka við liðinu.

„Ég kom hingað vegna þess að ég hreifst af verkefninu, ég hef hafnað störfum sem hefðu borgað mér mun meira en ég kom hingað vegna þess að ég vil ná árangri og koma félaginu aftur upp í úrvalsdeildina. Mér skilst að það séu alls kyns sögusagnir á kreiki en það sem hefur verið sagt er algjör þvættingurm, ef ég á að vera hreinskilinn“ sagði Rooney í viðtali við BBC. 

Rooney sneri á dögunum aftur í enska boltann eftir að hafa stýrt liði D.C. United í Bandaríkjunum síðastliðið ár. Þar áður þjálfaði hann Derby County í tvö tímabil eftir að hafa lagt skóna á hilluna. 

Í fyrsta leik sínum við stjórnvölinn mætir hann fyrrum liðsfélaga sínum hjá Manchester United, Michael Carrick sem stýrir liði Middlesborough. Liðið situr í 16. sæti Championship deildinni eftir slæma byrjun á tímabilinu en hefur unnið síðustu fjóra leiki sína í deildinni.  

Birmingham hefur byrjað betur og er í 6. sæti deildarinnar eftir 11 leiki, unnu síðustu tvo leiki á heimavelli og skoruðu í þeim sjö mörk en liðinu hefur reynst erfitt að spila á útivelli, hafa tapað síðustu þremur leikjum í röð og eiga því ærið verkefni framundan í ferðalaginu til Middlesborough.