Böðuðu sig í lokuðu Bláa lóninu

Vilhelm Gunnarsson, ljósmyndari Vísis, var á svæðinu við Grindavík í dag og myndaði stöðuna í bænum. Þar er unnið hörðum höndum að því að fylla í sprungur auk þess sem holur finnast hér og þar í bæjarfélaginu sem fólk þarf að hafa varann á.

Vilhelm myndaði Bláa lónið úr lofti og kom honum í opna skjöldu að sjá mátti fólk njóta sín í fallega veðrinu í dag. Fréttastofa hefur ekki upplýsingar um hvaða fólk naut sín í heitu vatninu.

Á heimasíðu Bláa lónsins segir að núverandi lokun Bláa lónsins, Silica hótels og Retreat hótels muni gilda til klukkan sjö að morgni fimmtudaginn 14. desember. Staðan verði endurmetin þá.

Neyðarstig almannavarna var um tíma á svæðinu en það var fyrir nokkru fært niður á hættustig.

Ekki hefur náðst í Helgu Árnadóttur, framkvæmdastjóra Bláa lónsins, eða Grím Sæmundsen stærsta eiganda lónsins í kvöld þrátt fyrir endurteknar tilraunir.

Frétt uppfærð 9. desember kl. 09:18:

Í svörum frá Helgu Árnadóttur, framkvæmdastjóra Bláa lónsins, segir að um sé að ræða starfsmenn. Þeir séu að undirbúa fyrirhugaða opnun lónsins.