Varð­skipið Freyja til Vest­fjarða vegna mikillar snjó­flóða­hættu

Töluverð hætta er metin á snjóflóðum á Norðanverðum Vestfjörðum í dag. Á vef Veðurstofunnar segir að á morgun, aðfangadag, sé spáð norðan­stormi og hríðarveðri og bú­ast megi við mikl­um skafrenn­ingi.

„Lít­ill snjór var fyr­ir og er lausa­mjöll­in sem nú þekur fjöll með fyrstu snjó­um víðast hvar. Lítið er um eldri fann­ir und­ir nýs­næv­inu. Bú­ast má við að vind­flek­ar bygg­ist upp í suðlæg­um viðhorf­um um helg­ina,“ seg­ir í ofanflóðaspá.  Þá er talin mik­il hætta tal­in á að snjóflóð falli á svæðinu á morgun.

Varðskipin Freyja til taks um helgina

Í tilkynningu frá Landhelgisgæslunni kemur fram að áhöfnin á varðskipinu Freyju hafi verið kölluð út að beiðni lögreglunnar á Vestfjörðum í gær vegna slæmrar veðurspár og hugsanlegrar snjóflóðahættu um helgina. Skipið hélt úr höfn á Siglufirði um miðnætti og ætti að vera komið á áfangastað nú undir morgun.

Átján manna áhöfn er um borð sem brást skjótt við kallinu. Miðað við veðurspá eru allar líkur á að skipið verði til taks á Vestfjörðum fram yfir helgi, af því er fram kemur í tilkynningunni.