Man. Utd missir Onana ekki strax eins og Liverpool missti Salah

Manchester United náði samkomulagi við knattspyrnusamband Kamerún um það að Onana færi ekki strax.

Aðalmarkvörður United mun því spila næstu tvo leiki liðsins, fyrst bikarleik á móti Wigan Athletic á mánudaginn kemur og svo deildarleik á móti Tottenham sem fer fram 14. janúar. ESPN segir frá.

Kamerún leikur sinn fyrsta leik í Afríkukeppninni aðeins einum sólarhring eftir Tottenham leikinn eða 15. janúar.

Ensku úrvalsdeildarfélögin urðu að losa leikmenn sem spila í Afríkukeppninni þann 1. janúar síðastliðinn.

Liverpool maðurinn Mohamed Salah yfirgaf sem dæmi Liverpool eftir sigurinn á Newcastle á Nýársdag og spilar því ekki bikarleikinn við Arsenal um komandi helgi. Egyptaland gæti farið langt á mótinu og Salah misst af allt að átta leikjum Liverpool.

Kamerúnska landsliðið er nú í æfingabúðum í Sádi-Arabíu og spilar vináttulandsleik við Sambíu 9. janúar næstkomandi.

Onana hætti í landsliðinu á miðju síðasta heimsmeistaramóti eftir ósætti við Rigobert Song þjálfara en var beðinn um að snúa til baka fyrir leik í undankeppni Afríkukeppninnar í september síðastliðnum sem og hann gerði.

Onana hafði áður sagt forráðamönnum United frá því síðastliðið sumar að hann væri hættur í landsliðinu. Það hefur örugglega áhrif á það að hann fær leyfi til að koma seinna til móts við landsliðið að þessu sinni.