Svan­dís grípur til að­gerða þótt lög­fræði­á­lit segi að þess þurfi ekki

Þetta segir Svandís Svavarsdóttir í yfirlýsingu á Facebook-síðu sinni í morgun.

„Það er í samræmi við niðurstöðu umboðsmanns en hann beinir ekki sérstökum tilmælum um úrbætur til mín, umfram það að hafa sjónarmiðin sem fram koma í álitinu í huga til framtíðar,“ segir Svandís í yfirlýsingu sinni.

Þingflokksformaður Sjálfstæðisflokksins, Hildur Sverrisdóttir, sagði um helgina flokkinn í viðbragðsstöðu og að viðbrögð VG geti breytt miklu um pólitíska stöðu. Þing kemur saman í dag eftir jólahlé en þar verður lögð fram vantrauststillaga í garð Svandísar vegna hvalveiðimálsins. Hildur sagði um helgina að flokkurinn myndi ræða viðbrögð sína þegar VG væri búið að bregðast frekar við áliti umboðsmanns. 

Bregst engu að síður við

Svandís segir í yfirlýsingu sinni að þótt svo að samkvæmt lögfræðilegu áliti sé ekki tilefni til sérstakra viðbragða hafi hún „engu að síður“ þó ákveðið að fela óháðum aðila að fara yfir stjórnsýslu og lagaumgjörð hvalveiða, þ.m.t. alþjóðlegar skuldbindingar ríkisins, og valdheimildir stjórnvalda á þeim grundvelli. Sá álitsgjafi verður jafnframt beðinn um að gera tillögur að úrbótum eftir því sem við á, og eftir atvikum tillögur að breytingum á lögum.

Þá ætlar hún einnig að fela ríkislögmanni að leggja mat á framkomið erindi Hvals hf. þar sem félagið óskar eftir viðræðum við ríkið um mögulegt uppgjör vegna álitsins.

„Ég gríp til þessara skýru viðbragða í ljósi þess að mikilvægt er að stjórnvöld beri virðingu fyrir eftirlitsstofnunum og sýni það í verki. Umboðsmaður Alþingis gegnir mikilvægu hlutverki í eftirliti með stjórnsýslu ríkisins í okkar lýðræðissamfélagi,“ segir Svandís í færslu sinni.

Álitið mikið umhugsunarefni

Þar segir hún álitið hafa verið henni mikið umhugsunarefni, sem stjórnmálamanns og embættismanns.

„Það er hverjum ráðherra þungbært þegar álit umboðsmanns leiðir í ljós að ráðstafanir séu ekki eins og best verður á kosið. Í þessu tilviki að útgáfa reglugerðar um hvalveiðar hafi ekki átt sér nægilega skýra stoð í lögum eins og atvikum var háttað í júní. Einnig að aðdragandi og undirbúningur reglugerðarinnar hafi ekki uppfyllt kröfur um meðalhóf,“ segir hún og að baki reglugerðar hennar hafi ekki verið illur ásetningur.

„Mér gekk ekkert annað til en að fara að lögum og þar á meðal og ekki síst mikilvægum lögum frá 2013 um að okkur beri að koma vel fram við dýr,“ segir Svandís og að hún hafi verið í þröngri stöðu bæði hvað varðar tíma og rúm. Hún hafi fengið álit fagráðs um dýravelferð þar sem kom fram að veiðar á hval gætu ekki samræmst dýravelferðarlögum.

Þá hafi hún falið ráðuneytinu að gera tillögur að viðbrögðum.

„Ég fór þá að öllu leyti að ráðgjöf ráðuneytisins og undirritaði reglugerð um frestun á upphafi vertíðarinnar þar sem unnt væri að nýta tímann til að m.a. kanna tillögur leyfishafans um það hvort og þá hvernig bæta mætti framkvæmdina. Ég hef ekki enn heyrt þá rödd sem telur að það sé réttlætanlegt að stunda ómannúðlegar veiðar á hvölum. Og umboðsmaður tekur raunar undir það að málefnalegt geti verið að líta til sjónarmiða um dýravelferð við reglusetningu á grundvelli hvalveiðilaganna. En nú er álit umboðsmanns komið fram og ég hlusta á þau sjónarmið sem þar koma fram og tek þau til mín,“ segir Svandís í færslunni sem er hægt að lesa hér að neðan.

Fréttin  hefur verið uppfærð og fyrirsögn breytt klukkan 8:57 þann 22.1.2024.