Of snemmt að kenna bikblæðingum um

„Þetta er nýlegt og það var sandað eins og er gert. Sömuleiðis varað við þeim,“ segir G. Pétur. 

Rútuslys varð í Öxnadal í dag þar sem rúta, með 21 erlenda ferðamenn innanborðs, hafnaði utanvegar og valt. Allir farþegar voru fluttir til Akureyrar og nú hafa fimm verið fluttir til Reykjavíkur með sjúkraflugi. Fljótlega eftir að slysið varð barst fréttastofu ábendingar um miklar malbiksblæðingar á veginum, auk þess sem umræða hefur farið fram á samfélagsmiðlum um að blæðingarnar væru slysagildra. 

Helgi Þorkell Kristjánsson rannsóknarstjóri hjá Rannsóknarnefnd samgönguslysa sagðist fyrr í kvöld ekki geta tjáð sig um einstaka atriði sem varpað gætu ljósi á orsök slyssins. Það verði aðeins gert með skýrslugerð sem birtist síðar. Nefndarmaður var sendur norður til að rannsaka vettvang.

G. Pétur segir einnig of snemmt að draga ályktanir.

„Menn verða bara að rannsaka núna og komast að því hvað raunverulega gerðist, svo við getum lært af slysinu eins og við viljum öll gera.“

Yfir sumartímann myndast slíkar blæðingar alla jafnan á heitum dögum, með tilheyrandi biki sem losnar. 

„Það var varað við þessu í dag og hraðinn tekinn niður,“ segir G. Pétur og bætir við að ekki hafi verið fleira tækt í stöðunni af hálfu Vegagerðarinnar.