Sauð upp úr í stjörnufansi á golfmóti Coolbet

Veðmálafyrirtækið Coolbet nýtur mikilla vinsælda meðal ungra karlmanna hér á landi. Það er ekki síst vegna þess hve margir áhrifavaldar eru tilbúnir að auglýsa vefsíðuna, sem má ekki auglýsa hér á landi. Það gera áhrifavaldarnir með því að klæðast fatnaði merktum fyrirtækinu, minnast á fyrirtækið í hlaðvörpum sínum eða státa sig af vel heppnuðum veðmálum. 

Viðkomandi áhrifavaldar bera þó litla áhættu af veðmálunum sjálfir heldur fá inneignir hjá Coolbet til að leika sér með gegn auglýsingum á samfélagsmiðlum. 

Í þetta skiptið bauð Coolbet fyrrnefndum áhrifavöldum og fleirum þjóðþekktum einstaklingum til golfmóts. Mátti bæði sjá vana kylfinga og aðra óvanari sem höfðu ekkert á móti því að gera sér glaðan dag þar sem allt var í boði hússins.

Afþreying og veitingar voru ekki af lakara lagi. Á einum teignum var Sigga Klingenberg, sem þekkt er fyrir stjörnuspár sínar, með bás og bauð gestum upp á lófalestur. Á öðrum var hægt að fá klippingu og rakstur samkvæmt nýjustu tísku og á enn öðrum var húðflúrari að störfum.

Á enn öðrum teignum var svo hægt að spreyta sig í pílukasti við Grindvíkinginn Matthías Örn Friðriksson, margfaldan Íslandsmeistara í pílukasti.

Fínt kampavín, bjór og smáréttir voru aðgengilegir hvarvetna og eftir að mótinu lauk var haldin veisla í gamla Nasa-salnum við Austurvöll og svo spilaður póker í boði fyrirtækisins. Langflestir skemmtu sér vel samkvæmt heimildum fréttastofu en þó voru tveir sem létu hnefana tala á tímapunkti. Þeir eru þó ekki meðal stjarnanna sem koma fyrir í þessari frétt.

Meðal keppenda voru athafnamenn, tónlistarmenn, íþróttamenn og fulltrúar fleiri framastétta á Íslandi. Ingólfur Þórarinsson, Ingó veðurguð, var á svæðinu ásamt Gumma Emil einkaþjálfara. Körfuboltamennirnir Jón Arnór Stefánsson og Martin Hermannsson mættu ásamt þjálfaranum Finni Frey Stefánssyni.

Patrik Snær Atlason, betur þekktur sem PrettyBoiTjokkó, mætti á hestbaki og Hákon Rafn Valdimarsson landsliðsmarkvörður var sömuleiðis í stuði. Telja mætti upp marga fleiri en myndir segja meira en þúsund orð. Þær má finna að neðan.