Rigning og súld í dag

„Í fyrramálið verðum við á milli lægða og því fremur hæg breytileg átt með vætu víðast hvar en seinnipartinn á morgun nálgast skil úr suðri og þá bætir í úrkomu á austanverðu landinu,“ segir í hugleiðingum veðurfræðings.

Á vef Vegagerðar má sjá að nokkuð greiðfært er um landið en fjallvegir lokaðir og upp á hálendi. Snjóflóðahætta er við Fagradal á Austurlandi og vegavinna víða. Nánar um veður á vef Veðurstofunnar og færð vega á vef Vegagerðarinnar. 

Veðurhorfur á landinu næstu daga

Á sunnudag:

Norðaustan 8-13 m/s norðvestantil, en annars hægari breytileg átt. Stöku skúrir eða él vestantil, en þurrt og sums staðar bjart á austanverðu landinu, en þykknar upp síðdegis með rigningu austast. Hiti 2 til 7 stig, en nálægt frostmarki norðanlands.

Á mánudag:

Norðaustan 5-10 m/s og él norðvestantil, en hægari og skúrir eða slydduél sunnan- og austanlands. Hiti í kringum frostmark, en að 6 stigum syðst.

Á þriðjudag:

Norðvestan 5-13 m/s, hvassast við norðausturströndina. Él á Norður- og Austurlandi framan af degi, en annars þurrt að kalla. Lægir og léttir víða til síðdegis, en stöku él við vesturströndina. Kólnandi. Vaxandi austanátt um kvöldið með úrkomu og hlýnandi veðri.

Á miðvikudag:

Ákveðin suðlæg átt með rigningu, en norðaustanátt norðvestantil og á annesjum norðaustanlands með slyddu. Hiti 0 til 9 stig, hlýjast syðst.

Á fimmtudag:

Útlit fyrir norðlæga átt með éljum fyrir norðan, en skúrir sunnan heiða.

Á föstudag:

Austlæg átt og rigning eða slydda en stöku él norðantil.