Kapp­ræður gerðar upp: „Hann lenti upp á kant við nánast alla í stúdíóinu“

Formenn allra stjórnmálaflokka sem bjóða fram í öllum kjördæmum mættust í líflegum leiðtogakappræðum á Stöð 2 í gærkvöldi. Andrés Jónsson almannatengill fylgdist grannt með í gærkvöldi en hann segir Sigmund Davíð Gunnlaugsson, formann Miðflokksins að vissu leyti hafa skorið sig úr.

„Hann æsti svolítið upp hópinn og á tímabili upplifði maður eiginlega að hann var svolítið að sameina aðra flokksformenn í andstöðu við sig,“ segir Andrés.

Hann segir erfitt að segja til um hvort þetta hafi verið klók nálgun hjá Sigmundi. „Þetta var alla veganna taktísk breyting frá því sem Sigmundur hefur áður gert í kosningabaráttunni. Hann hefur verið meira á léttu nótunum,“ segir Andrés. Til þessa hafi Sigmundur til að mynda gert meira af því að hrósa og jafnvel taka undir með pólitískum andstæðingum annað slagið, en annar tónn hafi verið í honum í gær. „Hann kom með allt aðra stillingu inn í þessar kappræður og lenti upp á kant við nánast alla í stúdíóinu.“

„Ég held að hann hafi ekki gert sér neina greiða í stöðunni, nema hann telji að hann sé að ná til einhvers óánægju fylgis með því að vera svona upp á kant við alla og mikið við stjórnandann. Hann leit ekki út eins og hann væri að fara í stjórn með neinum í þessu pallborði,“ segir Andrés.

Öll frekar góð, sérstaklega konurnar

Annars telur hann að heilt yfir hafi formennirnir staðið sig vel. „Mér fannst þau öll frekar góð. Formið var skemmtilegt, flestir fengu að njóta sín, flestir náðu að prófílera sig eins og þeir vildu gagnvart sínum kjósendahópi. En maður sá líka að það er kannski ekki svo langt á milli flestra flokka nema þá kannski helst Miðflokksins og Lýðræðisflokksins, manni fannst þeir vera svolítið sér á parti,“ sagði Andrés.

Þá hafi kvenkyns formennirnir átt gott mót. „Mér fannst konurnar eiginlega allar góðar,“ segir Andrés. „En mér fannst konurnar aðeins hverfa í seinni hlutanum þegar þessi æsingur fór að taka yfir.“

Miklar væntingar hafi til að mynda verið til Kristrúnar Frostadóttur og hún hafi staðið undir þeim. „Hún hefur ekki kannski fyrr en í gær, bæði hjá morgunblaðinu og síðan á Stöð 2, mér fannst hún virkilega sýna hvað í henni býr,“ segir Andrés. Þá hafi Þórhildur Sunna Ævarsdóttir verið „sterk, yfirveguð og með gott tempó“ nefnir hann sem dæmi.

„Forsætisráðherrabragur“ á reynsluboltanum

Aðrir leiðtogar hafi einnig staðið sig vel. „Mér fannst Þorgerður Katrín algjörlega, eins og hún hefur verið í kosningabaráttunni allri, vera forsætisráðherrabragur á henni. Maður finnur þetta mikla sjálfstraust sem geislar af henni og það var líka til staðar í gær. Hún virtist líka vera byrjuð í því hlutverki að rétta út hendur, hvort sem það er vegna væntanlegra ríkisstjórnarmyndunar eða hvort það er bara hennar háttur sem reyndasta manneskjan þarna í stjórnmálum,“ segir Andrés. Hún hafi til að mynda verið dugleg að hrósa. „Hún hrósaði eiginlega öllum, meira að segja aðeins hughreysti Sigmund Davíð þegar hann var orðinn mjög æstur á tímabili. Þannig mér fannst hún sýna góða takta.“

„Það voru allir vel á pari,“ segir Andrés. Bjarni Benediktsson hafi náð að koma sínum áherslum vel á framfæri en hvorki hann né Sigurður Ingi Jóhannsson hafi átt neinn stjörnuleik. „Og Arnar Þór hann var alveg góður, fyrir sinn hatt,“ bætir Andrés við.

Hann kallar eftir tíðari kappræðum í sjónvarpssal. „Ég held við ættum líka að vera með svona þætti oftar. Þetta var vel pródúserað og maður hefur séð þetta á norrænum stöðvum að þetta er oftar svona þættir, kannski tvisvar þrisvar á önn ætti að vera þáttur með svona skipulagi. Af því að þetta varð á tímabili bara mjög dínamísk og skemmtileg umræða og eiginleikar fólksins sáust vel, dínamíkin á milli þeirra og þetta var gott sjónvarp,“ segir Andrés.

Kappræðurnar í heild sinni má sjá í spilaranum hér að neðan.