Hassan Shahin flúði heimaland sitt Sýrland, vegna ástandsins þar árið 2012 og fór upphaflega til Íraks í leit að betra lífi. Þaðan lá leiðin til Þýskalands og Grikklands. Hann kom svo til Íslands árið 2017 og eiginkona hans árið 2021. Hann hefur síðustu ár rekið farsæla saumastofu á Hverfisgötu og er nýbúinn að stækka við sig. Hassan segir að erfitt að lýsa léttinum yfir að hálfrar aldar grimmilegri valdatíð Assad fjölskyldunnar í Sýrlandi sé loks lokið.

Margir að snúa aftur heim til Sýrlands

„Þetta er ólýsanlegur léttir. Það hafa margir vinir okkar sem höfðu flúið Sýrland haft samband og segjast ætla fara strax aftur heim til Sýrlands, segir Hassan.

Hassan á foreldra og systkini búsett í Damaskus höfuðborg Sýrlands sem hann hefur ekki hitt í þrettán ár. Hann heyrði í þeim um helgina þegar í ljós kom að Assad var flúinn frá landinu.

„Þau hringdu strax í mig aðfaranótt sunnudags og voru í skýjunum yfir því að Assad væri farinn. Ég fylgist grannt með fréttum frá Sýrlandi um helgina og gat ekki sofið  í sólahring,“ segir Hassan.

Bróðir lést á leið til Íslands

Hassan segir að gleðin yfir að valdatíð Assad sé lokið sé líka blönduð trega. Hamad 23 ára bróðir hans hafi látist á flótta frá Sýrlandi árið 2021 þegar för hans var heitið hingað til lands

„Ég hafði hvatt hann til að koma til Íslands og hann var á því ferðalagi þegar hann lést. Hann var á ferðalagi um eyðimörkina milli Írak og Íran þegar hann örmagnaðist og lést,“ segir Hassan hryggur í bragði.  

Hassan segir að ríflega hálfrar aldar valdatíð Assad fjölskyldunnar í Sýrlandi skilji eftir sig mikla eyðileggingu og mikið uppbyggingarstarf fram undan.

„Assad fjölskyldan skilur eftir sig mikla eyðileggingu og hefur valdið ólýsanlegum hörmungum. Það er mikil vinna sem þarf nú að fara í gang svo hægt sé að byggja landið aftur upp en ég hef mikla trú á samlöndum mínum,“ segir hann.

Hún kemur með frið

Hassan vonar innilega að friður komist nú á í heimalandinu. Svo heit er óskin að hann og eiginkona hans ákváðu að skíra nýfædda dóttur sína Salam.

„Salam þýðir friður á islensku. Hún fæddist þann 24. nóvember og kemur með frið,“ segir hann. 

Takk Ísland

Hassan og fjölskylda hans hafa fest rætur hér á landi og vilja hvergi annar staðar búa. Hann vonar hins vegar að hann geti loksins heimsótt heimaland sitt þegar ástandið róast þar.

„Við eigum heima á Íslandi, hér líður okkur ofboðslega vel. Við höfum eignast okkar eigin ættingja hér á landi og eigum í íslenskum vinum okkar, systkini, foreldra og meira segja ömmur og afa. Takk Ísland fyrir að taka svona vel á móti okkur,“ segir Hassan að lokum