Fagnaði tví­tugs­af­mælinu í Vivienne Westwood

„Stemningin í afmælinu var alveg ótrúleg. Allir mættu í litum eða hvítu, og það var algjört partý. Afmælið var haldið á Höfuðstöðinni og var ótrúlega gaman að geta kíkt í feldherbergið á listasýninguna og svo farið fram í skemmtunina. 

ClubDub kíkti við og stillti stemninguna algjörlega fyrir restina af kvöldinu. Þetta var alveg ógleymanlegur dagur,“ segir Jón Breki og bætir við:

„Ég elska að halda upp á afmælið mitt! Mér finnst skemmtilegast að finna eitthvað þema fyrir tilefnið. Ég hef lítinn áhuga á að vera í öllu svörtu, þannig að í ár var afmælið með litaþema.“

Hann segir að hjartnæm og einlæg gjöf standi þó algjörlega upp úr frá kvöldinu.

„Systir mín gaf mér bókina Love Letters to JB með bréfum frá mínu besta fólki, bæði frá Íslandi og Danmörku. Það þótti mér ótrúlega vænt um,“ segir Jón Breki en hann bjó í Danmörku fyrstu sautján ár lífsins.

Eins og sönnum tískuunnanda sæmir lagði Jón Breki allt í afmælisfötin sem komu frá ólíkum hátískuhúsum.

„Ég var í hvítri skyrtu frá bresku drottningunni Vivienne Westwood og pallíettubuxum frá ítalska tískuhúsinu Missoni.“

Jón takmarkar sig alls ekki við ákveðin tískuhús.

„Ég á rosalega erfitt með að velja uppáhalds fatamerki en ef ég þyrfti að nefna eitt sem stendur upp úr í fataskápnum mínum núna um jólin, væri það örugglega danska merkið Stine Goya. Ég er sérstaklega hrifinn af jökkunum frá þeim.“

Aðspurður hvaða litir séu í uppáhaldi hjá honum fyrir jólin segir hann:

„Blár, silfur, rauður og fjólublár. Þetta eru litirnir sem heilla mig mest núna. Ég elska að klæðast litríkum fötum og þessir litir hafa verið í miklu uppáhaldi að undanförnu. 

Enda voru blöðrurnar í afmælinu í alls konar björtum og skemmtilegum litum.“

Hann segist vera búinn að ákveða föt fyrir jólin en þau eru ekki endilega í hans anda.

„Jóladressið í ár verður þetta klassíska. 

Fjölskyldan mín er með hefð fyrir því að vera í ljótum jólapeysum og okkur finnst það bæði ótrúlega skemmtilegt og spennandi að sjá hver peysa ársins verður.“