Kostnaður við nýja sánuklefa í Vestur­bæ um 130 milljónir

Komið verður fyrir tveimur nýjum hefðbundnum sánuklefum (þurrgufum) og einum infrarauðum klefa í stað þeirra sem voru. Framan við þessa klefa verður hvíldarrými með sturtum, bekk og drykkjarfonti.

Á sama tíma á að gera nýja starfsmannaaðstöðu inn af alrými við afgreiðsluna þar sem staðsett verður þvottaaðstaða, ræstirými og aðstaða sundkennara. Auk þess verður lagfærð snyrting gesta á sama svæði. 

Ný skábraut og lyfta

Þá verður bætt aðgengi hreyfihamlaðra að afgreiðslu um sólargang með nýrri skábraut. Skábrautin er með tvöföldum handlistum beggja vegna. Þá verður einnig sett inn ný lyfta með fallvörn sem felld er niður í gólf. Lyftan verður staðsett í alrými við afgreiðslu, sem tenging við skábrautina. Einnig á að endurnýja glugga á báðum langveggjum til suðurs og norðurs meðfram rýmum.

Umhverfis- og skipulagssvið borgarinnar áætlar að heildarkostnaður við framkvæmdina sé 130 milljónir króna. Gert er ráð fyrir að hægt verði að hefja framkvæmdir í apríl og stefnt að því að þeim ljúki í júní 2025.

Sjálfstæðismenn furða sig á sameiningu

Málið var tekið fyrir á fundi borgarráðs í vikunni. Borgarfulltrúar Sjálfstæðisflokksins lögðu fram bókun á fundinum þar sem þau furðuðu sig á áformum borgarinnar að hafa ekki lengur sánuklefana kynjaskipta.

„Sundlaugar Reykjavíkur gegna mikilvægu lýðheilsuhlutverki og eru algengur samkomustaður fólks í hverfum borgarinnar. Sannarlega er nauðsynlegt að ráðast í endurbætur á sánuklefum Vesturbæjarlaugar en fulltrúar Sjálfstæðisflokks telja mikilvægt að fylgja vilja íbúanna við alla útfærslu. Íbúar Vesturbæjar hafa þegar lýst ríkum vilja til að hafa sánuklefa sundlaugarinnar áfram kynjaskipta og undrast fulltrúar Sjálfstæðisflokks áform borgaryfirvalda að ætla ekki að fylgja þeirri afstöðu íbúa,“ segir í bókun borgarfulltrúanna.

Breytingarnar hafa verið nokkuð umdeildar en með þeim er verið að fjarlægja kynjaskipta sánuklefa og sameina þá. Fjallað var um málið á Vísi í vetur. Þá sögðu einhverjir Vesturbæingar breytingarnar fæla fastagesti frá lauginni á meðan aðrir fögnuðu því að fá innrauða sánu í stað þurrgufunnar í karlaklefanum.

Forstöðumaður laugarinnar sagði þó lítið annað hafa verið í stöðunni, þar sem karlasánan hafi verið orðin fúin og ógeðsleg. Sánunni var svo endanlega lokað þann 5. desember og þá var hafið niðurrif.

Í fréttinni hér að neðan var fjallað um „Stóra sánumálið“ og meðal annars greint frá því að kynjasameiningunni væri ætlað að stemma stigu við óviðeigandi hegðun sem hefði viðgengist í sánuklefunum.

Flestir vilji gufuböð fyrir öll kyn

Reykjavíkurborg hefur síðustu vikur, í tengslum við þessar breytingar, athugað viðhorf borgarbúa til gufubaða í sundlaugum Reykjavíkur. Í tilkynningu á vef borgarinnar í dag kemur fram að flestir sundgestir kjósi fjölbreytt framboð gufubaða fyrir öll kyn. 

Þar kom til dæmis fram að um 75 prósent gesta vilji annaðhvort hafa gufuböð fyrir öll kyn eða eru hlutlausir. Munur er þó á svörum á milli lauga og gestir þeirra lauga sem bjóða í dag aðgreindar gufur fyrir konur og karla leggja mun meiri áherslu á það. Nánar hér.