„Ömur­legasta sem fólk getur fengið sem bólfélaga“

Hann segir henni fjölga um allan heim en Íslendingar séu ekkert endilega bara að taka hana heim að utan.

„Þetta er í mörgum sumarbústöðum og víðs vegar á heimilum hjá fólki,“ segir Steinar Smári.

Hann segir veggjalúsina algengasta á gististöðum eins og hótelum, hostelum og bústöðum. Hann segir veggjalúsinni alveg sama um uppruna, hún komi sér fyrir hvar sem er.

Steinar Smári segir marga rugla saman veggjatítlu og veggjalús.

„Veggjatítlan étur timbur en veggjalúsin étur okkur.“

Steinar Smári segist alltaf ganga í skugga um það þegar hann fer erlendis að það sé ekki veggjalús. Það geti verið erfitt að finna þær þegar þær eru kannski nýkomnar. Hann segist byrja á því að leita á hornum rúmanna og við lappir gaflanna. Á hornum rúma sé oft að finna efnisbút sem er heftaður við rúmið og þar eigi þær til að fela sig.

„Það er felustaðurinn sem hún elskar að fela sig á.“ Þá segir hann einnig höfuðgaflinn vinsælan felustað. Sé ekki höfuðgafl þá finni þær sér annan stað. Þær geti líka falið sig í gardínum, undir gólfi, náttborðið, bakvið slökkvara eða bakvið mynd á vegg.

„Hún finnur alltaf einhvern felustað.“

Hringja þegar þau verða bitin

Hann segir ekki endilega tilefni til að leita að þeim reglulega en segir þó tilfellunum hafa fjölgað mikið síðustu mánuði. Fyrir rúmu ári hafi hann verið að fara í útköll vegna veggjalúsa um einu sinni í viku en um síðustu áramót hafi útköllum skyndilega fjölgað og verið fjögur eða fimm á viku í janúar í fyrra.

„Núna eru komin níu í þessari viku.“

Hann segir bitin oftast ástæðuna fyrir því að fólk hringir. Hann fari þá á heimili fólks til að kanna málið.

„Þetta er örugglega það ömurlegasta sem fólk getur fengið sem bólfélaga,“ segir Steinar Smári.

Hann segir veggjalúsina ekki það litla að hún fari framhjá fólki og það sé auðvelt að finna hana. Hann segir nauðsynlegt að kalla til sérfræðinga vilji fólk losna við hana. Steinar Smári mælir ekki með því að reyni sjálft að eitra. Það sé hægt að nota þurrgufuvél á pöddurnar en líka ýmis efni eins og kísilkúr.

Dugar ekki að henda fötunum út í frostið

„Það dugar ekki að henda fötunum eða húsgögnum út í frostið á Íslandi. Pöddurnar drepast við fjóra eða fimm í mínus en eggin lifa alveg upp í mínus 18 gráður,“ segir Steinar Smári og því þurfi að setja dótið í frystigám eigi að bjarga því.

Hann segir eggin líka drepast við 50 gráðu hita og það þurfi því mikið til. Í Bandaríkjunum sé hitinn notaður til að drepa hana.

Til að koma í veg fyrir það að taka hana með sér heim mælir Steinar Smári með því að fólk leiti að henni við höfðagafl eða á hornum rúma sé það að gista á hóteli. Finni það ekkert eigi það samt ekki slaka á. Það eigi að hafa ferðatöskuna sem lengst frá rúminu og ekki opna hana nema í stutta stund.

„Ég hef hana jafnvel inni á baði,“ segir Steinar Smári og að hann setji fötin ekki inn í skáp nema eftir fyrstu tvær næturnar. Eftir það megi fólk verða kærulaust.

„Þá væru þær búnar að bíta þig.“