Milljarðar Menntasjóðsins skrítnir þegar stúdentar sligist undan vöxtum

Vorið 2019 samþykkti Alþingi frumvarp menntamálaráðherra um nýjan Menntasjóð námsmanna, MSNM, sem tók við af Lánasjóði íslenskra námsmanna. Lánasjóðurinn hætti þá að veita lán en fjöldi fólks er enn að endurgreiða lán sín til sjóðsins. 

Fjallað var um það á Vísi í dag að frá því að Menntasjóðurinn tók við árið 2020 hafa útlán sjóðsins verið fjármögnuð með endurgreiðslum lántaka LÍN. Á sama tíma hafa 30 milljarðar úr ríkissjóði safnast upp á reikningum Menntasjóðsins.

„Auðvitað finnst okkur svolítið skrítið að það hafi verið til fleiri, fleiri milljarðar inni á bankabók hjá sjóði sem á að vera fjárhagslegt stuðningsnet stúdenta á sama tíma og við erum búin að vera að greiða 9% vexti á óverðtryggðum lánum og stöndum frammi fyrir mjög mikilli óvissu um greiðslubyrði og mjög mikilli skuldsetningu,“ segir Lísa Margrét Gunnarsdóttir forseti Landssambands íslenskra stúdenta. 

Skref í rétta átt

Háskólaráðherra hefur lagt til breytingar á lögum til að skýra lögin og munu endurgreiðslur til LÍN nú renna til ríkissjóðs og útlán verða fjármögnuð úr ríkissjóði - eins og alltaf átti að gera.

Í frumvarpinu eru einnig lagðar til breytingar, til dæmis á fyrirkomulagi á veitingu námsstyrks. Í stað þess að 30% af láninu falli niður í lok náms, sé það klárað á réttum tíma, þá falla 20% niður í lok hverrar annar og 10% að námi loknu.

„Ef þú færð ekki þennan námsstyrk þá er greiðslubyrði 62 prósentum hærri og því finnst okkur þetta mjög þarft skref.“

Eins eru lagðar til breytingar á vaxtafyrirkomulaginu. Lagt er til að vexir reiknist frá námslokum og vaxtaviðmiðun lánanna byggi á þriggja ára meðaltali vaxta í stað eins mánaðar.

„Þetta er klárlega skref í rétta átt en það er ljóst að það þarf að ráðast í miklu, miklu umfangsmeiri breytingar,“ segir Lísa.